CAV modangop sa DOJ kay wala sila matagbaw sa pagbasura sa kaso vs DOJ marshal sa rape case

CEBU, Philippines - Ang Crusade Against Violence (CAV) mosupak sa resolusyon sa Department of Justice (DOJ) nga nagpakawalay bili sa reklamo sa biktima sa pagpanglugos nga ang suspek marshal sa Witness Protection Program sa DOJ.

Ang pangulo sa CAV, Thelma Chiong, nagkanayon nga moduso sila og motion for reconsideration sa DOJ sulod karong semanaha aron supakon ang resolution nga gipagawas ni prosecutor Felixberto Geromo sa Cebu City Prosecutor’s Office nga nag-ingon nga dili tinuod ang mga pasangil batok ni Ronelo Fabroa nga milugos sa iyang gibantayan nga biktima sa gang rape nga gipaubos sa Witness Protection Program.

Kombinsido si Chiong nga wala magtumo-tumo ang biktima aron lang maguba ang iyang kadungganan.

Samtang si Piskal Geromo mibutyag nga imposibleng dunay lugos nga nahitabo tungod kay ang biktima miangkon man nga siya nagpuyo  ilawom sa Witnesss Protection Program uban ang iyang pag-umangkon. Gani kanunay niya kining ikadulog. Matud sa piskal nga daghang pamahayag ang biktima nga lisod katuohan.

Gihimakak ni Fabroa ang mga pasangil batok kaniya ug ang mga petsa nga gipangbutyag sa reklamante wala siya’y duty nianang mga adlawa ug gani suportado kini sa ilang log book.

Ang mga statements ni Fabroa nasuportahan ug napalig-on usab sa ubang mga witnesses nga nagpuyo usab sa safehouse.

“Yes. We all listened to the complainant’s story and hear her cry for justice. But the remedy lies not with us but somewhere. In the Psychiatric Evaluation Report of Dr. Renato Obra, he recommended on what has to be done with her. It should be done without delay, otherwise, she will become a waste forever,” base sa resolution.

Kahinumduman nga ang reklamante gidala sa usa ka psychiatrist ug base sa iyang findings,  ang reklamante nakasinati og posttraumatic stress disorder gikan sa mga “stressors” sa gawas sa safehouse, ug ingon man nymphomania o hypersexuality ug malingering.

Samtang gibutyag ni Geromo nga ang pamasangil sa reklamante batok kang Fabroa nasinati usab ni PO3 Sam Evalle sa Lapu-lapu City Police Office kinsa mi-escort sa reklamante diha sa WPP. Matud pa nga giingong dunay mga “sexual advances” ang reklamante ngadto kaniya. Matud pa nga sila si Fabroa ug Evalle  parehong “good looking.”

Sa interview sa Banat News,  si Fabroa nagkanayon nga nalipay siya sa resolution ni Geromo. Matod niya nga wala gyud siya’y “sexual desire” ngadto sa reklamante.

Ang maong kaso, matod niya usa ka ‘urom’ kay wala siya makatug, iyang asawa nga bag-ong nanganak gi-atake ug iyang mga anak gipang-bully sa eskuylahan.

Ang maong kaso matod niya nakaapekto sa iyang kinabuhi ug sa institusyon nga iyang gitrabahoan. (BANAT NEWS)