Firetrucks nga gipangapud-apod sa kalungsoran bawion sa Kapitolyo

CEBU, Philippines - Nagtinguha karon ang Kapitolyo sa pagbawi sa mga trak sa bombero sa kalungsuran ug itugyan kini ngadto sa Bureau of Fire Protection. Atol sa niaging sesyon sa hunta probinsiyal, si Bokal Grecilda Sanchez, ang niduso sa pagbawi sa mga trak sa kabomberohan nga iya sa Kapitolyo.

Kini nunot sa hangyo ni BFP 7 Director Maria Luisa Hadjula ngadto kang Gob. Hilario Davide III nga ipadonar ngadto sa ilang buhatan aron sila na ang moatiman niini.

Si Bise-Gob. Agnes Magpale nikompirmar nga daghang trak sa kabomberohan ang dili na magamit sa pagkakaron nga anaa sa kalungsuran.

Ang kasabutan nagkanayun nga ang trak pabiling panag-iyahon sa Kapitolyo samtang ang mga lokal nga kagamhanan na ang moatiman niini.

Ang giduso nga mosyon ni Sanchez nakamugna og pangutana gikan kang Bokal Joven Mondigo Jr. mahitungod sa katuyoan sanglit tanang lungsod sa iyang distrito ang apektado niini.

“The intention is simply to tip-top-shape,” matud pang Sanchez.

Si Bokal Peter John Calderon niduso nga ihiklin una ang pagpasar sa mosyon ni Sanchez ug dapiton ang BFP sa sunod nilang sesyon aron mohatag og katin-awan sa mga pangutana sa mga sakop.

Uyon si Sanchez sa mosyon ni Calderon samtang iyang gipasalig nga magpabilin sa hingtungdang lungsod ang trak sa bombero bisan idonar pa kini ngadto sa BFP.

Dugang ni Sanchez nga ang bawion lang mao kadtong dili na modagan aron kini mapaayo. (BANAT NEWS)