Mga opisyal sa Talisay nangaon og seafoods

CEBU, Philippines - Ang mga opisyal sa dakbayan sa Talisay  nagtapok kagahapon sa buntag didto sa merkado publiko sa barangay Tabunok ug nangaon og mga sea foods.

Si Talisay City Councilor Antonio Bacaltos Jr. nga nahinabi sa Banat News mibutyag nga ang mga manindahay og isda nagping-it  sa kahinay sa ilang halin.

Nahitabo  kini human malunod   ang MV St. Thomas  Aquinas  didto sa Lawis Ledge  sa Talisay  sa miaging  Biyernes  sa gabii.

Matud ni Bacaltos nga posibleng ang mga mamalitay nabalaka nga kontaminado sa oil spill ang mga isda ug uban pang mga seafood nga gibaligya  sa merkado sa siyudad.

Si Bacaltos nagkanayon nga aron ipakita sa publiko nga luwas kaonon ang mga isda  sa merkado, namalit sila og isda ug uban pang mga seafood sama sa nokus, pasayan ug uban pa  sa merkado sa Tabunok. Ila   kining gipaluto ug dayon nagdungan sila og pangaon niini.

Si Bacaltos nagkanayon nga kasagaran sa isda nga ibaligya sa Talisay naggikan  sa lain-laing lugar sama sa Bohol ug Bantayan.

Si Bacaltos miawhag  sa publiko nga dili mabalaka kay  dili  peligro  nga  kaonon ang mga isda  sa merkado sa Talisay. (/WC) (BANAT NEWS)