Kataposang punoan sa mangga sa Mango Avenue luwason sa CH
CEBU, Philippines - Usa ka dakong punoan sa mangga diha sa atubangang bahin sa University of San Carlos North Campus sa dalan General Maxilom Avenue ang ideklarar sa siyudad nga usa ka Heritage Tree. Matud ni Konsehal James Cuenco nga kun madeklarar nga “heritage tree†ang maong punoan sa mangga ubos na kini sa proteksyon sa balaud nga dili na mahimong putlon.
Gipasabot ni Cuenco nga bugtong handumanan ang maong dakung punoan sa mangga sa paghingalan sa maong karsada kaniadto nga “Mango Avenue†apan sa ngadto-ngadto giilisan og General Maxilom Avenue.
Si Cuenco nagkanayon nga sa sayong bahin sa siglo 1900’s, si Don Jose Avila nananom og daghang mga mangga diha sa daplin sa karsada mao nga gihinganlan kini’g Mango Avenue.
Ang libro “Cebu: More than an Island†nga sinuwat ni Resil Mojares naghisgot niining maong manggahan samtang ang hulagway sa daghang mga tinanom nga mangga gipatik usab sa libro nga sinuwat ni Lucy Urgelio Miller.
Matud ni Cuenco nga ang kadaghanan sa mga punoan sa mangga nga tinanom kaniadto ni Don Jose Avila daplin sa karsada gipamutol tungod sa paspas nga paglambo ug pagtukod og mga balay-patigayon. Ubos sa Republic Act 10066 kon National Cultural Heritage Act angayan lang nga protehean ang maong bugtong punoan sa mangga nga kabahin na sa kasaysayan sa maong karsada. (BANAT NEWS)
- Latest
