Dugang transport terminals giuyonan sa bag-ong CITOM chair

CEBU, Philippines - Pabor ang bag-ong tsirman sa City Traffic Operations Management (CITOM) Board nga dugangan ang mga transport terminal nga mo-operate dinhi sa dakbayan aron makahatag kini og dugang kasayon sa katawhan.

Matud ni CITOM Chairman Ruben Almendras nga basta ang mga transport terminal dili lang makahasol sa pag-agi sa mga sakyanan diha sa mga karsada wala siya’y pagsupak.

Dinhi sa dakbayan sa Sugbo ang Citilink Terminal na lang nga anaa mahimutang duol sa Cebu City Medical Center (CCMC) maoy gihugopan sa mga van-for-hires ug mga passenger jeepneys alang sa habagatang bahin sa Sugbo.

Sa north district, dunay mga terminal nga nag-operate  diha sa Cebu Business Park (Ayala), sa White Gold Club Compound ug sa SM City sa North Reclamation Area.

Sa laing bahin, si Almendras miingon nga tinguha niya nga mangayo’g tabang gikan sa mga national government agencies, sama sa Department of Transportation and Communications (DOTC), nga makakuha sila og kwarta nga mapaayo ang gubaon na nga electronics traffic censors dinhi sa dakbayan.

Ang maong kahimanan nga gipalit sa dakbayan sa Sugbo gikan sa Sydney, Australia daghang tuig na ang nakalabay, nangaguba na diha ilawom sa karsada duol sa mga eskena.

Matud ni CITOM Executive Director Rafael Christopher Yap nga 78 ka “major intersections” ang gibutangan niining maong mga electronics traffic censors nga maoy mo-transmit og signal ngadto sa ilang central control room aron mo-coordinate sa mga traffic lights.

Gusto ni Almendras nga kontakon nila ang supplier sa mao nga mga electronics traffic censors sa Sydney, Australia kay basin og mahimo ra nga ayuhon ang maong mga guba nga censors kay sa mopalit na usab og bag-o nga mahal ang kantidad.

Tinguha usab ni Almendras nga mamalit og daghang CCTV camera aron magamit kini sa traffic monitoring aron kadtong adunay mga cellphones mahimo ra nga magiyahan sila kun asa maayo moagi nga malikay sila sa grabeng trapiko sa ilang pagmaneho. (BANAT NEWS)