60-anyos nga biyuda milayat sa Marcelo Fernan Bridge naluwas

CEBU, Philippines - Usa ka 60-anyos nga biyuda ang milayat sa Marcelo Fernan Bridge sayo sa buntag kagahapon apan nasalbar sa kapolisan sa Opao Police Station sa dakbayan sa Mandaue.

Si Gina (di tinuod nga pangan) ug residente sa Purok Tambis,  Brgy. Umapad sa maong dakbayan nakit-an sa mga residente sa maong dapit nga naglakaw sa maong taytayan kagahapon sa alas-6 sa buntag ug dayong katkat sa metal railings niini ug miambak padung sa Mactan channel. Si SPO2 Juan Calamba sa Opao Police Station nagkanayon nga usa ka job order employee nga maoy mitawag sa polis.

Miresponde dayon ang upat ka mga polis ug si PO2 Pasaylo Bandolon nanghuwam og usa ka pumpboat ug daling gi-rescue ang biktima kinsa naninguha nga makalangoy padaplin.

Daling gidala ang biktima sa Mandaue City Hospital ug gibalhin sa Vicente Sotto Memorial Medical Center.

Matud pa sa mga kabanay niini  si Gina sige nang misuway sa paghunos sa iyang kinabuhi  apan kanunay nila kining matabang.

Una na  kining misuway pagpakamatay pinaagi sa paggamit og  pisi ug misuway na usab kini sa pag-inom og gas apan napugngan kini nila.

Si Gina kanunay nang nagmasulob-on sukad nga namatay ang bana niini pipila na ka buwan ang milabay. (BANAT NEWS)