‘Buang’ misuway og kawat sa P8 milyones nga yati

CEBU, Philippines - Usa ka lalaking gituohang may deperensya sa pangisip ang misuway og kawat sa usa ka yati nga nagkantidad og P8 milyones diha sa usa ka pribadong pantalan sa barangay Looc, dakbayan sa Mandaue niadtong miaging adlaw.

Ang suspetsado nga nadakpan mao si Joel  Catcha, 24, taga dakbayan sa Lapulapu nga giingong usa ka habal-habal drayber.

Si   PO1 Melvin Pelayo sa kapolisan sa Presinto 5 sa Mandaue City Police Office (MCPO) nga nagbase sa barangay Opao sa maong dakbayan miingon nga gipadagan  na unta ni Catcha ang yati nga gipanag-iya ni Rey Sanchez apan nalambod sa pisi ang propeller niini. Ang boat captain sa maong yati nga si Panfilo dela Cruz  nahingangha nga gisakyan na og laing tawo ang iyang yati maong dali siyang misakay niini ug gipawong ang makina aron di na makadagan.

Daling mitawag sa kapolisan si Dela Cruz hinungdan sa pagkasikop sa suspek apan nakugang sila dihang ilang giimbestigar ang suspek tungod kay likuy kini kun motubag hinungdan sa pagduda nilang buang kini. (BANAT NEWS)