Barbero nga taga Labangon gipatay sa Balamban

CEBU, Philippines - Patay diha-diha  ang usa ka barbero nga  nagbarug- barog  sa karsada gawas sa barber shop nga iyang gitrabahoan didto sa barangay Buanoy sa lungsod sa Balamban niadtong Biyernes sa alas 8:00 pasado sa gabii.

Ang biktima mao si Eugene Ian Acha, 30,  ulitawo,  nga   taga Tisa,  Labangon, dakbayan sa Sugbo ug kasamtangang nagpuyo sa Balamban. Sa  pagsuwat  ning balita wala pa matumbok ang responsabli   nga  mipatay  sa biktima.

Apan  ang  mga saksi  mitug-an  sa kapolisan  nga  nagsul-ob  og kawo ug nag- unipormi  usab  sa  mga  trabahante  sa Tsunishi Industries Inc,  usa ka  pabrika  sa barko  sa maong  lungsod.

Si PO1 Donard Pitogo sa Balamban Police Station  mibutyag  sa Banat News  nga   ang biktima,  usa  ka extrador nga manunupi  sa usa  ka barber  shop  sa maong  lugar.

Unya  samtang  naghuwat  kini og kustomer  nagbarug-barog  kini sa daplin  sa karsada  duol  sa barber  shop  nga  iyang gitrabahoan  dihang  kalit lang  miabot  ang  kriminal.

Matud  pa  sa  mga  saksi  nga wala  makabantay  ang  biktima  tungod  kay  way timailhan  nga  patyon  siya  sa tawo  nga  miduol kaniya, dihang kalit  kining  milanit    sa  iyang  armas  ug gidul-itan ang  biktima  dayong  pabuto  niini.

Ang biktima  kinsa  nasabak  sa tiyan, dughan ug uban pang bahin sa lawas,  diha-diha  natumba  sa yuta  ug  naligo  sa kaugalingong  dugo  niini  dayong  kabugto  sa kinabuhi.

Gani  wala  na  kini  madala  sa  tambalanan  kay  nasuta  man  sa kapolisang  mirespondi  sa maong krimen nga  patay  na kini  diha-diha.

Human  matumba  ang  biktima  dali kaayong  nakapahilayo  sa maong  dapit  ang  kriminal nga w ala  hiilhi  sa  mga  nakasaksi.

Ang kapolisan nakapunit  og   4 ka kabhang sa kalibre .45 nga  pistola  uban  sa duha  ka  lumping  nga bala  nga gituohang gikan sa armas nga gigamit sa kriminal  sa pagpatay s a biktima.

Ang kapolisan padayon pang nag-imbistigar sa maong hitabo aron pagtugkad sa motibo sa  maong  krimin ug sa pag-ila  sa kriminal.

Samtang  gisusi  usab  sa mga otoridad   ang background sa biktima  aron  masayran  ang hinungdan  nganong  gipatay  kini. WC (BANAT NEWS)