Dugang tulo ka negosyante nailad sa bouncing checks

CEBU, Philippines - Dugang pa nga mga negosyante dinhi sa Sugbo ang midangop sa Theft and Robbery Section (TRS) sa Lapulapu City Police Office (LLCPO) ug misang-at  og reklamo batok sa grupo ni Aljohn Abrenica kinsa giingong nangisyu og mga nanguntol nga tseke.

Matud pa ni Inspector Josenilo Abello, hepe sa TRS sa kapolisan,  dugang pang tulo ka biktima sa grupo ni Abrenica ang mireklamong gibayran sila og close account nga tseke.

Si Abrenica maoy gituohan sa kapolisan nga maoy lider sa sindikato sa mga mangingilad sa mga negosyante.

Ang magpapatigayon nga si Mark Loreto, 28, taga lungsod sa Liloan mitug-an  sa iyang taho ngadto sa TRS  nga lima ka coffee vending machines nga nagkantidad og P76,000 ang  gi-order ni Abrenica ngadto kaniya pinaagi sa pagtawag sa telepono ug gibayran siya og  tseke. Apan sa iyang pagpailis na niini sa bangko, closed account na diay kini.

Si Loreto miingon nga nagpaila ang lalaki nga nag-order nga usa ka Aljohn Abrenica.

Dugang nabiktima mao ang Sumisho Motor Finance Corporation sa dakbayan sa Mandaue. Ang collection officer sa maong tindahan nga si Jonathan Opena miasoy sa kapolisan nga niadtong Mayo 11 niining tuiga,  usa ka babaye nga nagpailang si Faith Booc Baya mi-order og motorsiklo ngadto kanila sa kantidad nga P128,000.

Ang maong babaye nga mihatag og down payment nga tseke nga nagdala nga P32,000 ug gipirmahan niini ang kontrata nga data-datahan lang og P7,000 kada bulan ang nahibilin nga bayranan niini.

Dihang ilang gisusi sa bangko dako ang ilang kahingangha nga untol ang maong tseke tungod kay closed account na kini.

Si Inspector Abello miingon nga moabot na sa 22 ka mga tindahan ang mireklamo kanila nga midangop sa ilang buhatan. Gipaabot sa kapolisan nga madugangan pa kini. (/EIM) (BANAT BALITA)