Prayer rally gipahinungod kang Ducayag

CEBU, Philippines - Usa  ka prayer rally  ang gipahigayon  kagahapon  sa kabanay  ni Mario Alfie Ducayag sa  pagsaulog  sa ika-40 diyas  human  sa kamatayon  niini  niadtong    April 12 .

Taliwa  sa kainit  sa adlaw, nagbaktas  ang  mga  kabanay, kaila, silingan  ug  kahigalaan  ni  Ducayag gikan sa Plaza  Independencia  paingon  ngadto  sa Gaisano  Metro Colon.

Matud  pa  sa pamilyang Ducayag  nga nagpasiugda  sa maong  rally  nga  ila  kining  gihimo aron  pagpalanog sa ilang  awhag  ngadto  sa mga otoridad  nga  unta  kahatagan  og  hustisya  ang  kamatayon ni Alfie.

Didto atubangan  sa maong tindahan ang nagtapok  nga  misalmot  sa maong rally mipadayag sa  ilang  sentimento bahin sa kamatayon  ni Alfie.

Ang  mga singgit  sa inahan ni  Alfie  nga  “wala  mamatay  sa tuberculosis ang akong anak, gipatay  gyud og tuyo ang  akong anak” maoy milanog  sa maong  lugar taliwa  sa daghang  katawhan  ug  mga  sakyanan  nga  naglabay-labay  sa maong  dapit.

Gipasabot  ni  Solidad Ducayag, ang  inahan  ni Alfie  nga  wa  sila  manggubot  sa maong  dapit  kundi gusto  lang  nilang  makita  ang  hustisya sa kamatayon  sa  iyang  anak.

Gisaysay ni Solidad nga bisan  taud-taod na nga namatay si Alfie  apan maglisud pa gihapon sila pagdawat niini.

Hinuon  iyang  gipasabot  nga  gisandig  nila  sa National  Bureau  of Investigation (NBI)  ang  pagtino  sa kamatuoran nga hinungdan  sa kamatayon  sa iyang  anak  ug  gipaabot  niya  nga  kadtong  mga tawong  responsabli  niini  kinahanglang  manubag  sa balaod  ug  angay  kapahamtangan  og  tukmang  silot.

Si Marcela Inoc, 63, usa  sa  misalmot  sa maong  rally nanghinaot  usab  nga matandog  ang  tagdumala  ug tag-iya  sa tindahan  nga  namatyan  ni  Alfie pinaagi  sa rally  nga  ilang  gihimo.

Samtang ang tigpamaba sa   establisemento nga hingtungdan gisuwayan  sa Banat News pagkuha  sa pamahayag  niini apan mibalibad  kini. (BANAT NEWS)