Police escort sa retiradong heneral gidakop
CEBU, Philippines - Usa ka senior police officer ang giunay og dakop sa kapulisan sa Mabolo Police Station kagahapon sa kaadlawon human giingong mihapak sa nawong sa usa ka taxi drayber gamit ang pistola diha sa Prince Court motel sa Barangay Mabolo ning dakbayan.
Nakuha ang usa ka .9mm Smith and Wesson nga pistola nga adunay 27 ka bala gikan kang SPO2 Emmanuel Cabilao, 52, taga Barangay Guadalupe.
Matud ni Cabilao adunay dokumento ang maong armas apan sutaon pa kini sa kapulisan. Si Cabilao nadestino sa Provincial Intelligence Branch-Cebu Provincial Police Office (PIB-CPPO). Escort usab siya ni Ret. Gen. Tiburcio Fuseliro, kanhi PRO-7 director.
Si Jesus Briones Logorin, 34, taga Barangay Labangon ug drayber sa RDSAMC taxi (JVX 317) mipasangil nga si Cabilao ug ang duha niini ka mga kauban misakay gikan sa Barangay Guadalupe ug nagpahatod paingon sa motel.
Si Chief Insp. Ryan Devaras, hepe sa Mabolo Police Station, mibutyag nga ang grupo ni Cabilao nakadesider magpamasahe diha sa may motel adtong higayuna. Wala hinuon mobutyag si Devaras kung nakainom ba ang maong polis.
Matud ni Devaras naglalis sila si Cabilao ug Logorin sa wala pa matinong hinungdan ug giingong gipakita ni Cabilao sa iyang armas ang drayber.
Sumala pa nga paghiabot na sa motel giingong giwitkan ni Cabilao si Logorin gamit ang pistola niini una pa kini mikanaug.
“Gikan sa motel nidiretso na siya (Logorin) sa police station,†matud ni Devaras. Daling giaresto si Cabilao kinsa nagpaila nga usa ka polis. Sa iyang bahin, si Sr. Supt. Patrocinio Comendador, hepe sa kapulisan sa lalawigan, mibutyag nga nagplano siya nga ibalhin si Cabilao ngadto sa Regional Personnel Holding Admin Unit (RPHAU)-7.
Si Comendador mitug-an nga adunay “attitude problem†si Cabilao. “Dunay gamay problema kanang dili motunga sa trabaho,†matud niya. Mopahigayon usab og imbestigasyon ang CPPO alang sa administrative nga kaso nga atubangon sa maong polis.
Laing kaso nga physical injury ug kalapasan sa Comelec gun ban ang ipasaka usab batok kang Cabilao. (BANAT NEWS)
- Latest
