Rama miinsister nga mas daghan gihapon ang iyang supporters

CEBU, Philippines - Miinsister gihapon si Mayor Michael Rama nga mas daghan gyud ang mga tawo nga mitambong sa rally sa Team Rama didto sa Plaza Independencia duha ka semana ang milabay kun itandi sa Bando Osmeña Pundok Kauswagan rally sa atubangan sa Kapitolyo niadtong Biyernes.

Ang kapolisan mihulagway nga ang Team Rama rally sa Plaza Independencia gitambongan og mga 30,000 samtang si Cebu City police director Mariano Natuel miingon nga bana-bana niya moabot og 65,000 ka tawo ang mitambong sa BOPK rally.

Matud ni Rama nga makauuwaw kaayo kini tungod kay bisan og diha pa ang presidente apan wala sila makapadugok og daghang tawo nga motambong sa BOPK rally.

Apan si Kongresista Tomas Osmeña nga lider sa BOPK nagkanayon nga nagpaila lang kini nga si Rama dili makamao nga moihap ug dili maantigo mobana-bana sa gidaghanon.

Ang acting chairman sa City Traffic Operations Management (CITOM) nga si Rafael Christopher Yap miingon nga ang mga tawo nga mitambong sa rally sa BOPK, susama ra sa gidaghanon sa mga tawo nga mipunsisok sa Kapitolyo aron pugngan ang pagpasuspenso ni Gobernador Gwendolyn Garcia.

Matud ni Yap nga iyang bana-bana mga 20,000 ra ka tawo ang mitambong sa rally sa BOPK. Iyang gihulagway nga ang Team Rama rally sa Plaza Independencia mas daghan ang nanambong.

Apan si Osmeña nagkanayon nga wala pa gani sila mikuha og mga artista apan mas daghan ang mitambong sa ilang rally. Gikareport nga ang Team Rama adunay laing rally nga ipahigayon  sa hinapos niining buwana o kaha sa unang semana sunod buwan. (BANAT NEWS)