Kampanya vs child sex tourism gilusad sa DOT-7

CEBU, Philippines - Gilusad sa Department of Tourism-7 ang Child Wise Tourism Program sa probinsiya sa Bohol, uban sa nagkalain laing ahensiya sa gobyerno ug civil society, aron sa pagpahunong sa "child sex tourism".

"Tumong ug tuyo sa maong programa mao nga mahunong na ang pagpanamastamas sa atong mga kabataan, kinsa maoy gitawag nga the nation's treasures," matud pa ni DOT-7 regional director Rowena Montecillo. Ang maong programa naglangkob usab sa pagpahigayon og training workshops sa mga stakeholders bahin sa eksploytasyon sa mga kabataan.

Ang mga programa, gisugdan na kaniadto pang 2004 gilusad sa nagkadaiyang tourists destination sa nasud sama sa Boracay, Puerto Gallera ug uban pa.

Ang maong programa, matud pa ni DOT director Maria Rica Bueno ilusad usab sa Cebu karong tuiga.

Usa ka covenant signing ang gihimo atol sa launching sa Bohol diin ang mga nagkadaiyang ahensiya sa gobyerno nisuporta aron sa pagbantay sa kabataan.

Giawhag usab sa DOT-7 ang mga ginikanan nga dili nila pasagdan ang ilang mga anak, labi na ang mga menor de edad nga kinsa kasagaran maoy mabiktima sa sex tourism. (BANAT NEWS)