PRO-7 mosusi kung lima ra gyu’y armas ni Paolo Garcia
CEBU, Philippines - Giawhag sa hepe sa kapolisan sa Rehiyon 7 nga ipatahan ang tanang mga armas nga wala matahan ni Paolo Garcia, ang anak ni suspended Governor Gwendolyn Garcia.
Kini subay sa migawas nga report nga giingong aduna pay tulo ka armas nga wala gitahan ni Garcia sa kapolisan.
Apan ang igsuon ni Garcia nga si Atty. Christina Garcia –Frasco kinsa maoy kauban niini pagtahan sa iyang lima ka lisensyadong armas “for safekeeping†diha sa Cebu Provincial Police Office, miklarong lima ra gyud ang armas sa iyang igsuon.
Matud pa ni PRO7 Chief Supt. Marcelo Garbo Jr. nga ilang sutaon ang maong report kung unsa ka tinuod nga aduna pay laing tulo ka armas nga wala gitahan ni Garcia.
Dugang pa ni Garbo nga iya nang gimandoan si Supt. Rex Derilo sa Firearms, Explosives, Security Service Agency and Guards Supervisory Section (FESSAGS) sa pagsuta niini. Saysay pa ni Garbo nga posibleng aduna sila’y pagabuhatong legal nga pamaagi susama sa pag-apply unya og search warrant.
Kahinumduman nga sa milabay’ng semana gitahan ni Garcia ang iyang armas nga Bushmaster 7.62 Rifle; Glock 26 .9mm pistol; Colt 5.56 rifle; Glock M19 9mm pistol ug Mossberg 12-gauge shotgun human na-revoke ang iyang mga lisensya pagbaton niini. (/EIM) (BANAT NEWS)
- Latest
