Tag-iya sa sakyanang natumbahan sa poste nangayo’g tabang

CEBU, Philippines - Usa ka tag-iya og sakyanan nga natumbahan sa poste diha sa barangay Camp 4, dakbayan sa Talisay ang mipatim-aw kagahapon sa buntag diha sa buhatan ni Konsehal Danny  Caballero aron mangayo og panabang.

Si Noel Abrica taga sitio Kimba, barangay San Roque, dakbayan sa Talisay mipasangil nga tungod sa gipahigayong pagpalapad sa karsada diha sa lugar hinungdan nga natumba ang maong poste.

Gibutyag ni Abrica nga ang maong insidente nahitabo niadtong buwan sa Nobiyembre sa milabay’ng tuig ug na-blotter kini diha sa barangay.

Matud niya nga niadtong higayona ang iyang drayber nga si Junnel Taño maoy nagdala sa iyang L300-FB gikan sa dakbayan sa Toledo paingon na untang mopauli diha sa San Roque apan pag-abot diha sa lugar nga nahitaboan kalit nga natumba ang poste ug maayong pagkaigo sa likod nga bahin sa iyang sakynan.

Human sa maong hitabo ang tag-iya sa QM Builder nga si Alan Quirante giingong mipasalig nga mohatag usab og pinansiyal nga tabang alang sa pagpaayo sa lumping sa sakyanan.

Apan matud ni Abrica nga hangtud kagahapon wala pa gihapon maatiman ang guba sa iyang sakyanan ug si Quirante dili na kini motubag kung iyang tawagan.

Si Willy Abatayo, project manager sa QM Builder nga nahinabi sa Banat News kagahapon nagkanayon kini nga dili sila motalikod sa ilang obligasyon.

Matud ni Abatayo nga na-forward na ngadto sa ilang main nga buhatan sa lungsod sa Dumanjug ang incident report kabahin sa problema ni Abrica ug follow-up na lang ang kuwang niini.

Si Abatayo midugang nga medyo daghang giatiman ang ilang buhatan hinungdan nga wala dayon ma-proseso ang reklamo ni Abrica.

Kahinumduman nga gikan diha sa Lagtang paingon ngadto sa ubang bukirang barangay sa Talisay dunay gipahigayong pagpalapad sa karsada kinsa ang maong proyekto ubos kini sa Department of Public Works and Highways (DPWH) ug ang contractor niini mao ang QM Builder.      

Kahinumduman usab nga niadtong milabay’ng semana patay si Letecia Alcoseba ug naangol si Jovy Laborada human sila maligdi sa dakung bato samtang nagsakay og habal-habal diha sa sitio Tangub, barangay Lagtang.

Hinuon ang QM Builder maoy miabaga sa mga pinansiyal nga gikinahanglan sa mga biktima.

Sa maong sitwasyon si Caballero mipalabang og resolusyon kagahapon sa buntag atol sa regular session sa konseho sa Talisay nga naghangyo kang Mayor Socrates Fernandez sa temporaryong pagpahunong           sa operasyon diha sa lugar.

Apan ang maong resolusyon ni Caballero gitugyan una ngadto sa committee on environment tungod kay ang mayor nakaluwat na kini og pamahayag nga dili una ipahunong ang operasyon tungod kay usa kini ka proyekto sa gobiyerno ug dunay gikatakdang adlaw nga taposon kini.

Hinuon kagahapon ang konseho sa siyudad gikatakdang mopadala og suwat ngadto sa QM Builder ug DPWH aron matuki ang kabahin sa insidente  nga nahitabo. (BANAT NEWS)