Paglahugay sa mga opisyal sa Comelec wa supaka

CEBU, Philippines - Ang mga kadagkoan sa One Cebu Party walay pagsupak sa paglahugay sa mga election officer ilabi na dinhi sa lalawigan sa Sugbo.

Suma pa ni Kongresista  Pablo John PJ Garcia nga uyon sila sa pagbalhin ni Provincial Election Supervisor Lionel Marco Castillano ngadto sa Bohol.

Sa samang  higayon  gihangop  usab  nila   ang mihulip  kang Castillano  nga si  Atty. Eddie Aba  nga gikan sa Negros Oriental nga mao  nay  bag-ong provincial election supervisor sa lalawigan sa Sugbo, matud  pa  ni  PJ.

Hinuon nanghinaot  siya nga si Atty. Aba mahimong instrumento alang sa pagkab-ot sa hapsay,ug malinawon nga piniliay ug ipatigbabaw ang makiangayon nga proseso sa election karong bulan sa Mayo.

Pipila  sa katarungan  nganong  lahugayon  ang  mga  opisyal  sa Comelec  sa panahon  nga  duol  na  ang  election  mao  ang  kabalaka  sa kadagkoan  sa maong  ahensya  nga basin  unya  adunay  mga  opisyal  nila  nga  modawat  og  kuwarta  nga suborno gikan  sa  mga  kandidato  nga  mao  na hinuoy makalawgaw  sa   resulta  sa piniliay. (/WC) (BANAT NEWS)