Higpit nga seguridad sa Palace of Justice nakapalangay sa mga husay sa mga kaso

CEBU, Philippines - Daghan ang nagbagulbol sa pag-estrikto sa seguridad sa Palace of Justice kagahapon nga gimando tungod sa pagpamusil sa sulod sa korte nga miresulta sa kamatayon sa tulo ka tawo ug pagkaangol sa usa sa miaging semana.

Makita kagahapon nga taas kaayo ang linya sa gawas sa Palace of Justice nga niabot sa Integrated Bar of the Philippines (IBP) Office gibanabanang 200 metros gikan sa pultahan sa korte.

Usa sa mga nireklamo sa maong policy si Benzie Matillano, traffic aide. Matud niya ang paglinya og taas kaayo sud sa 30 minutos nakahasul gyud kaayo kanila. Matod niya naa pa siyay hearing nga tambongan sa alas 8:30 a.m. apan nakasud siya 9:00 a.m. na kapin.

Si Matillano gikan pa ni duty. Pero ni pull out tungod kay naa siyay atenan nga hearing.

Matud niya wala siya kahibaw nga ingon niadto ka kahigpit ang seguridad.

Si Macario Patindol usa sa nilinya miingon nga OK ra niya ang paglinya alang sa kaluwasan ug seguridad sa mga tawong mosulod sa korte.

Si Regional Trial Court (RTC) Judge Macaundas Hadjirasul, committee chair on security at the Palace of Justice nisusi kun unsay dagan sa unang implementation sa No ID NO Entry Policy.

Sa pagkakita sa kadaghan sa mga tawo nga naglinya ug nakaapektar na sa husay sa mga kaso diha sa korte dali siyang mihimo og adjustment ug gisuspenso ang   pagpalista sa mga pangalan sa mga mosulod diha sa log book basta aduna ray mapresentar nga identification card.

Apan giklaro ni Hadjirasul nga naa gihapoy frisking ug pag-rekisa sa mga gamit sa mga mosulod. Gikatakdang pakig-kitaan ni Hadjirasul si Executive Judge Silvestre Maamo aron tukion ang maong problema.

Kahinumduman nga niadtong Martes,  usa ka Canadian nga si John Pope ang mipatay nila ni Dr. Reynold Rene Rafols ug abogado niini nga si Jubian Achas sa sulod sa Municipal Trial Court in Cities Branch 6 ug miangol kang State Prosecutor Ma. Theresa Casiño diha sa MTCC Branch 1.

Si Pope niadto dayon sa Office of the Cebu City Prosecutor’s ug gipangita si Cebu City Prosecutor Nicolas Sellon ug ubang piskal nga iyang gika-aligutgotan. (/EIM) (BANAT NEWS)