Gikiha nga TF/BN reporter sa Canadian nga si Pope nalooy

CEBU, Philippines - Nahuwasan sa iyang gibati ug kahasol apan naluoy sa Canadian national nga si John Pope ang reporter sa The Freeman ug Banat News nga si Niña Sumacot.

Si Sumacot kinsa nadestino sa police beat gipasakaan og kasong libelo ni Pope niadtong tuig 2011 lakip na ang editor-in-chief sa The Freeman nga si Jerry Tundag.

Ang kiha may labot kini sa estoryang gisuwat ni Sumacot nga diin gi-alarma si Pope tungod sa pag-atang-atang niini sa gawas nga bahin sa klinika ni Dr. Reynold “Rene” Rafols diha duol sa Cebu Doctors Hospital.

Si Pope gikatahong nasuko kang Rafols tungod sa mga kasong gipasaka batok kaniya ug niadtong tungora gidakop kini sa mga polis sa Fuente Police Station tungod kay nagdala kini og pistola uban sa duha ka magazine nga bala niini.

Isip tigbalita ang maong insidente nahimoan og article ni Sumacot sa The Freeman apan gipasakaan siya og kasong libelo sa maong Canadian national sa rason nga daghang sayop ang nahisgutang artikulo ni Sumacot usa na niini ang iyang address kay dili niya madawat nga ‘temporary resident’ sa Guadalupe ang gibutang sa reporter.

Matud pa ni Sumacot iya rang gisunod ang impormasyong iyang nakuha gikan sa kapolisan ug wala usab makapakita og kamatuoran si Pope nga siya permanente nang residente sa Guadalupe dihang kini gipangayoan.

Ang maong kaso didto gipasaka ni Pope sa Mandaue City Prosecutors Office apan niadtong Nobiyembre, 2012 si Sumacot ug Tundag nakadawat og kopya sa desisyon ni Fiscal Wilfredo Pangandoyon, Jr. nga nagbasura sa kasong libelo nga gipasaka ni Pope tungod sa ka kuwang niini og merito.

Apan si Pope mi-apelar gihapon tungod kay dili niya madawat ang desisyon sa korte. Gawas kang Sumacot hasta ang arresting officer sa Fuente Police Station nga si Insp. Isagani Pugoy nga midakop kaniya giapil sa gireklamo ni Pope ug gipasanginlang bakakon.

Gireklamo usab niya ang mga piskal tungod sa pagdudang ‘bias’ kini sa mga kasong iyang gipasaka.

Apan kagahapon sa buntag naukay ang Sugbo tungod sa nahitabong pagpamusil ni Pope diha sulod sa korte, napatay niya si Rafols kinsa maoy mikiha  niya og kasong malicious mischief tungod sa pagpamato sa balay sa doktor.

Si Sumacot nagkanayon kini nga nahuwasan siya sa kabalaka tungod kay ang kasong gipasaka ni Pope batok kaniya ug ni Tundag mahunong na.

Apan gibati usab siya og kalooy sa Canadian national human  siya makadawat og report nga giingong naglaroy-laroy na kini tungod kay wala kini pamilya nga nag-atiman nganhi sa Sugbo. (BANAT NEWS)