Fluvial procession milampos bisan dunay mga badlungong motorbanca

CEBU, Philippines - Luwas nga nahuman ang gipahigayong tinuig nga fluvial procession pahinungod sa kapistahan sa Senyor Sto. Niño kagahapon diha sa Mactan Channel.

Ang fluvial procession naggikan sa siyudad sa Mandaue sa Ouano Wharf, patubang sa Muelle Osmeña ngadto na sa daang Mactan Bridge ug midunggo kini ngadto na sa Pier Uno sa syudad sa Sugbo.

Ang galleon nga gisakyan sa imahen ni Sr. Santo Niño mao ra usab ang gisakyan sa imahe sa Birhen sa Guadalupe.

Matud ni Cebu Coast Guard station commander Rolando Punzalan nga walay nahitabong insidenti sa kadagatan atol sa pagpahigayon sa prosesyon.

“Overall, it was satisfactory since we were able to meet our objective and our time schedule,” pasabot pa ni Punzalan.

Gipadayag usab ni Punzalan nga adunay 65 ka mga registered vessels nga mi-uban kanila atol sa maong prosesyon ug 60 usab ka marshall sea crafts.

Apan adunay 30 usab ka mga wala marehistrong sakyanan sa dagat ang nangapil sa maong kalihokan.

Gihulagway usab ni Punzalan nga adunay pipila ka mga tag-iya og motorbancas ug ubang sakynang pangdagat nga wala motuman sa kung unsay gisabotan sa arrangement sa mga barko.

Apan bisan paman niini mapasalamaton gihapon si Punzalan tungod kay nagmalampuson ang maong kalihukan.

Gibana-banang liboan ka mga tawo ang mikuyog sa maong fluvial procession ug liboan usab ang mga tawong misaksi diha sa isi og ka baybayon sa Mactan Channel gikan sa Manduaue, Lapulapu ug Cebu Cities.

Sa nasayran, sa miaging tuig nga fluvial procession, adunay 246 ka mga sakyanang pangdagat ang misalmot sa maong kalihukan diin 136 lang niini ang narehistro. (BANAT NEWS)