Magpale, Garbo ug uban pa gi-subpoena sa piskal
CEBU, Philippines - Gipadalhan na og summon sila si Acting Governor Agnes Magpale ug tulo ka police officials arun patubagon sa pasangil nga gipasaka sa anak sa suspendidong gobernador nga si Gwendolyn Garcia sa Cebu City Prosecutor’s Office.
Ang maong summon gipadala aron mapadayon na ang preliminary investigation aron sutaon kun naa bay igong basehan ang pasangil ni Pablo Garcia III nga ipasaka sa korte ang robbery charges.
Ang respondents sa kaso gitagaan og napulo ka adlaw o kutob Enero 26, 2012 sa pagsumitir sa ilang counter-affidavit sa pagtubag sa pasangil. Niadtong Enero 14, 2013 gi-served ang summon.
Kahinumduman nga si Garcia mipasaka og kaso human wala mabalik kaniya ang iyahang gi-rent nga tulo ka tolda nga gi-confiscate sa mga police.
Ang mga tulda gibutang atubangan sa Kapitolyo niadtong Disyembre 18 aron pasilongan sa pagpahigayon og Santos nga Misa ug sa ilang prayer vigil. Si Garcia miingon nga giabangan niya ang mga tulda sa Sheentrade Marketing sa tag P2,600 matag adlaw.
Apan niadtong Disyembre 19 sa alas 9:30 sa gabii atol sa gihimong vigil sa mga supporters sa gisuspensong gobernador nangabot ang 80 ngadto 100 ka PNP personnel ug gipangtangtang ang tent ug gikarga sa PNP trucks.
Matod niya hangtod karun wala pa mauli ang maong mga tulda. Sa laing bahin, si Garcia mipasaka og amended complaint ngadto sa buhatan ni Cellona nga nag-withdraw sa pangalan ni Department of the Interior and Local Government (DILG) Secretary Manuel Roxas II sa ilang gipangkasohan ug gipuli si Magpale.
Gawas kang Magpale, apil sa gikasohan sila si Director Marcelo Garbo sa Police Regional Office (PRO)-7, Supt. Leopoldo Cabanag ug Police Inspector Alvino Enguito. (BANAT NEWS)
- Latest
