Motor nadasmag sa awto , rider patay

CEBU, Philippines - Patay ang usa ka lalaking nagmotorsiklo human kini madasmagi sa awto sa usa ka nurse diha sa Gate 2 sa South Road Properties sa habig sa Talisay kagahapon sa hapon.

Ang nakalas giila base sa nakuhang lisensya niini sa pagmaneho mao si Ronilo Anavesa Barnes, nga may address nga Central Barangay sa Hilongos, Leyte.

Samtang ang nakadasmag kaniya mao ang registered nurse nga si Marion Nacu Villarmina, nga taga barangay Cansojong sa siyudad sa Talisay.

Sumala pa gikan si Villarmina sa trabaho padulong na pauli ug nagsunod siya kang Barnes nga luwan sa usa ka scooter apan dihang mi-overtake si Villarmina nadungog na lang niya ang paka sa iyang sakyanan.

Daling gihunong ni Villarmina ang sakyanan ug gisusi ang nipaka ug mao na lay iyang nakit-an si Barnes nga nagbuy-od na ug nagkadugo. Dali siyang mitawag og tabang apan ang mga rescuers gikan sa Talisay mideklarar nga patay na kini.

Gisusi pa sa mga imbestigador kung kinsay sad-an sa nahitabo, apan base sa pamahayag ni Villarmina daw dunay gikaon si Barnes samtang nagmaneho.

Sumala pa nga adunay nakit-ang nagpasad nga bibingka sa dalan duol sa gikatumbahan ni Barnes ug diha sa iyang baba. (BANAT NEWS)