Zubiri masaligong malutsan ni Garcia ang suspension
CEBU, Philippines - Mibisita sa gisuspensong gobernador sa Sugbo nga si Gwendolyn Garcia si kanhi senador Miguel “Migz” Zubiri aron pagpadangat sa iyang pagsuporta ug pagsimpatiya sa gobernador.
Apan giklaro ni Zubiri nga ang iyang pagbisita dili isip politiko kondili isip usa ka suod nga higala sa pamilyang Garcia.
Matud pa niya mao kini ang iyang bawos sa pagbisita si Garcia kaniya dihang nidesisyon kining mo-resign sa pagkasenador human gikwestyon ang legitimacy sa iyang pagdaug isip senador.
Gitumbok ni Zubiri nga nasubo siya sa gidangatan ni Garcia. Nagtuo usab ang kanhi senador nga mapatigbabaw gyud ang kamatuoran ug hustisya sa kadugayan.
Nanawagan siya sa Court of Appeals nga mopagawas na sa ilang desisyon kabahin sa gipangayong Temporary Restraining Order nga giduso sa mga abogado ni Garcia ug miingon nga “Justice delayed, justice denied.”
Gipahibawo usab ni Zubiri nga si Senador Ramon “Bong” Revilla gikatakdang moduaw kang Garcia karong adlawa, adlaw nga Sabado.
Nibisita usab sa gobernador dungan ni Zubiri si City of Naga mayor Valdemar Chiong uban sa tibuok nga konseho sa siyudad sa Naga nga gipangulohan ni Vice mayor Delfin Senior aron pagduso sa ilang hiniusang resolusyon nagpadayag sa ilang hugot nga pagsuporta sa gobernador. (BANAT NEWS)
- Latest
