Responder namatay sa inpeksyon   

CEBU, Philippines — Namatay ang usa ka 50- anyos nga volunteer responder sa search and rescue operation sa Binaliw trash slide tungod sa septic shock human nga na-inpeksyon ang samad sa iyang wala nga kuko sa tiil.

Matud pa ni Konsehal Dave Tumulak, tsirman sa Cebu City Risk Reduction Management Office,  base sa medical findings, nga septic shock secondary to severe wound infection” ang hinungdan sa iyang kamatayon.

Usa kini sa mga responders gikan sa Toledo nga nitabang sa Cebu City pagpangita sa kapin 30 ka mga natabunang mga trabahador sa Prime Waste Solutions Inc. Cebu human nidahili ang daw bukid kadaghang basura ug natabunan ang Material Facility Recovery sa maong pasilidad.

Nahibaw-an usab nga aduna kini Type 2 diabetes nga gituohang usa sa nakapa komplikar sa iyang sitwasyon kay nigrabe man ang iyang impeksyon.

Matud pang Tumulak, base sa impormasyon nga gihatag sa pamilya sa namatay didto nadestino sa ground zero site ang ilang amahan.

Niresponde ang ilang grupo sa Binaliw niadtong Enero 10 hangtod 13 base sab sa check-in form.

Apan ang iyang anak niingon nga sa iyang pagpauli sa ilaha nagmulo ang iyang amahan sa padayon nga pagsakit sa iyang tiil kay naluthan kini tungod sa pagsige og sul-ob sa botas sulod sa pipila ka adlaw.

"Pag-uli niya, naglain na iyang lawas ug sige siya’g sul-ob sa boots. Niluthan iyang tiil ug na-infection," matud pa sa anak.

Ang impeksyon gikataho nga nagkagrabe mao nga naaghat ang pamilya sa pagdala kaniya sa Miller Hospital sa Cebu City. Gikumpirma usab sa pamilya nga dugay na nga nadayagnos nga adunay diabetes ang ilang amahan.

Gipaabot nalang ni Tumulak ang opisyal nga death certificate aron ma-finalize ang dokumentasyon ug matan-aw kung unsang posibleng tabang ang mahatag gikan sa Department of Social Welfare and Development (DSWD) ug sa Cebu City Government alang sa namatyan nga pamilya. (BANAT NEWS)