Mga mag-uuma nakadawat og ayuda gikan sa DA
CEBU, Philippines — Ang mga mag-uuma sa humay gikan sa San Miguel, Bohol nakadawat og agricultural inputs nga nagkantidad og kapin P2.9 milyones gikan sa Department of Agriculture-Central Visayas (DA7), nga gipundohan ubos sa DA-Rice Program.
Ang mga agricultural inputs nga nikantidad og P2,937,153.00 nga discount voucher naglakip sa inorganic fertilizer, bio-fertilizers, ug soil ameliorants.
Mokabat sa 1,859 ka mga mag-uuma ang nakadawat sa maong mga ayuda sa panguma.
Sa maong gidaghanon, 643 ang nahatagan og inorganic fertilizer nga mobalor og P1,728,016.00; mokabat usab sa 637 ka mag-uuma ang nakadawat og bio-fertilizers nga mikantidad og P714,077.
Samtang 579 ka mag-uuma ang nakadawat og soil ameliorants (chicken manure) nga nagkantidad og P495,060.00.
Ang pag-apod-apod sa mga FDV gipasiugdahan sa mga kawani sa DA-PATCO-Bohol Rice Program, sa pakigtambayayong sa Local Government Unit sa San Miguel pinaagi sa Office of the Municipal Agriculturist ug sa partner merchant, ang San Miguel Farmers Agrivet Supply.
Matud sa DA-7 ang roll out niining fertilizer discount voucher (FDV) alang sa cropping season 2024-2025, aron matabangan ang mga mag-uuma sa ilang panginahanglanon sa abono alang sa ilang produksyon sa humay.
Sa pag claim, ang mga mag-uuma kinahanglang mopresentar sa mga voucher ngadto sa mga partner merchants.
Ang FDV roll out magpadayon hangtod sa Biyernes, Marso 28, 2025. Sa sunod semana, ang DA-7 miingon nga moadto sila sa laing munisipyo isip venue sa distribusyon. (BANAT NEWS)
- Latest
