Kapin 6,000 ka benepisyaryo sa 4Ps nakadawat na og ayuda
CEBU, Philippines — Gibanabana nga moabot sa kapin 6,000 ka households sa Central Visayas nga na-enrol sa Pantawid Pamilyang Pilipino Program (4Ps) ang nakadawat sa ilang First 1,000 Days (F1KD) cash grants niadtong Pebrero ning tuiga.
Sumala sa Department of Social Welfare and Development, atol sa pilot payout sa FIKD sa miaging buwan, 6,906 ka households ang nakadawat sa ayuda para sa buwan sa Enero ug Pebrero.
Sa maong ihap, 3,987 households ang gikan sa Cebu ug 1,790 eligible households sa Bohol.
Samtang sa Probinsya sa Negros Oriental, 1,038 ka households ang nakadawat sa ilang FIKD cash grant, ug ang Siquijor dunay 91 ka households.
Ang matag kwalipikadong benepisyaryo sulod sa panimalay nakadawat og cash grant nga P350 kada bulan.
Matud ni DSWD-7 Regional Director Shalaine Marie Lucero, sa unang duha ka bulan, wala gipatuman ang mga kondisyon sa 4Ps ubos sa FIKD.
Apan sa mosunod nga mga bulan, hugot na nga bantayan sa city ug municipal links sa 4Ps ang pagtuman niini uban sa lokal nga mga health personnel.
Si Director Lucero midugang nga ang mga miyembro sa 4Ps nga buntis ilang i-monitor alang sa pagtuman sa gi-require sa DSWD.
Kini naglakip sa pre-natal services nga ma-access sa DOH-accredited health facilities, pag-track sa ilang pagbuntis ug pagdawat og ante-natal care services, child birthing o delivery sa DOH-accredited health facility, pagtambong sa post-natal visits, pag-apil sa counseling sessions, ug pagkuha og micronutrientization supplements.
Sa mosunod na mga bulan posibleng mapun-an pa ang gidaghanon sa mga benepisyaro sa 4Ps ubos sa FIKD, busa giawhag ni Lucero ang mga benepisyaryo nga dunay pregnant members o mga bata nga nag-edad 24 months ug paubos nga i-update ilang profiles pinaagi sa pagbisita sa ilang 4Ps City and Municipal Links gamit ang i-Registro. —MEL BANAT NEWS
- Latest
