Grabeng kainit sa panahon sugod Abril hangtud Mayo

CEBU, Philippines — Mipahimangno si Engineer Oscar Tabada kinsa kanhi Philippine Atmospheric, Geophysical, and Astronomical Services Administration Director ug weather consultant karon sa Dakbayan sa Sugbo nga ipaubos og “state of preparedness” ang dakbayan agi og pagpangandam sa tumang kainit nga masinati sa buwan sa Abril ug Mayo.

Matud pa ni Tabada nga sugod karong Abril masinati na ang grabeng kainit sa panahon apan kinahanglan mas mangandam sa buwan sa Mayo kay mas init pa gyud kini.

Dugang pa ni Tabada nga ang heat index sa Abril magsugod sa 37 degrees Celsius ug mosaka pa kini ngadto na sa 42-43 degrees Celsius.

Apan giklaro niya nga dili hinuon kini susama nga kainiton sa miaging tuig tungod sa El Nin?o.

Sa report sa Cebu City Public Information Office nga matud pa ni Tabada atol sa ilang panagtigom sa Cebu City Disaster Risk Reduction and Management Council nga ipaubos nga dakbayan sa “state of preparedness” kay masinati ang taas nga temperatura nga makadaot sa kahimtang sa panglawas.

Pahimangno pa sab niya kinahanglang moinom og daghang tubig aron malikayan ang epekto sa kainit sama sa pagka-sapoton, pagpamikog, heat stroke, ug pagkalipong nga moresulta sa pagkatumba.  IBM BANAT NEWS