Problema sa rugby boys pangitaan na og solusyon

CEBU, Philippines — Mohimo og lakang ang City Office for Substance Abuse Prevention (COSAP) sa tahu nga niabot na sa kabarangayan ang gitawag og mga rugby boys ug giingong makamugna na og kagubot.

Gibutyag ni COSAP’s Executive Director Jonah John Rodriguez nga nakadawat siya og complaints gikan sa mga barangay apil na sa barangay Capitol Site ug Camputhaw nga aduna nay presensiya sa mga rugby boys sa ilang dapit.

Ang mga opisyal sa barangay nisuway sa pag rescue sa maong mga rugby boys apan makit-an nga mobalik ra gihapon sila sa karsada, gani pipila sa mga residente ang gikatahung mabiktima sa maong mga batan-on.

“Kuyaw na gyud ang situation aning mga rugby boys kay nakadawat naman gud ta og reklamo nga ang uban ani nila manghilabot ug mangawat,” suma pa ni Rodriguez.

Ang Rugby boys mao kini ang mga bata nga na adik sa pagsuyop og contact sement kun kining gitawag og rugby ug ubang matang sa solvents.

Gitug-an ni Rodriguez nga niuyon na si Mayor Raymond Garcia sa pagmugna og technical working group nga maoy mohimo og guidelines kun unsaon pagpahigayon ang rescue operations.

Ang COSAP, Department of Social Welfare Services (DSWS), ug ang Cebu City Commission for the Welfare and Protection of Children (CCCWPC), ug mga law enforcement agencies ang nihimo na og strategic meeting aron maumol ang mga lakang pagsulbad sa maong problema. Gidugang ni Rodriguez nga pinaagi sa rescue operations ug interventions, sila naglaum nga maminusan ang presensya sa mga rugby boys sa kadalanan sa dakbayan.

Si Mayor Garcia nagplano sa pag-isyu og executive order aron adunay legal basis nga magsuporta sa himoong operasyon.

Sa higayon nga mapirmahan na ang EO, ang City government posibleng makasugod na sa rescue operations sa first quarter sa tuig 2025.

Hinuon giklaro ni Rodriguez nga dili lang sila kutob sa rescue operations kundili mohatag usab sila og psychosocial intervention sa kabataan nonot sa ilang paggamit sa solvent nga maisip usab nga illegal drugs.

“If you notice, daghang ma rescue nga rugby boys pero mobalik ra gihapon sa dalan igkahuman. Dili unta ta magbalik balik og rescue,” dugang pa niya. —Gikan sa The Freeman/MEL   BANAT NEWS