Upat pilionong opisyal ginganlan

CEBU, Philippines — Gibutyag ni acting Cebu City Mayor Raymond Garcia ang mga pangalan sa posibleng maoy iyang piliong mamahimong sunod nga direktor sa Cebu City Police Office (CCPO).

Ang mga gikonsiderar ni Garcia mao ang kasamtangang  CCPO officer-in-charge P/Col. Antonietto Cañete;  kanhi hepe sa Special Weapons and Tactics sa CCPO nga nahimo sab direktor sa Lapu-Lapu City Police Office kaniadto nga si P/Lt. Col. Arnel Banzon; P/Lt. Col. Jovito M. Atanacio ug P/Lt. Col. Randy Caballes.

Si Atanacio kasamtang pangulo sa Police Regional Office-7 Information and Communications Technology Management Division, si Caballes hepe sa Talisay City Police Station ug Banzon kasamtangang nadestino sa Negros Oriental.

Lima gyud unta ang papilian, apil niini si P/Lt. Col. Dyan Agustin apan siya na karon ang gitudlong acting police director sa LCPO.

 Giklaro hinuon ni Garcia nga natagbaw siya sa liderato ni Cañete karon ug nakasabot siya nga dili sala sa mga polis nganong dunay mga krimen apan miklaro nga obligasyon nila kining santaon.

Daan ng gipadayag ni Garcia nga ang gusto niyang mohupot sa CCPO mao kadtong opisyal nga adunay epektibong crime solutions. (BANAT NEWS)