World Bamboo Day gisaulog sa Mandaue

CEBU, Philippines — Nakighiusa ang mga opisyal ug mga kawani sa kagamhanan sa dakbayan sa Mandaue sa pagsaulog sa World Bamboo Day 2024.

Kini nonot sa gipahigayon nga bamboo tree planting activity diha sa Mandaue Green Learning Park sa Barangay Umapad nga gitambongan sa mga opisyales sa siyudad nga gipanguluhan ni acting Mandaue City mayor Glenn Bercede ingon man ni suspended mayor Jonas Cortes.

Ang pagsaulog sa World Bamboo Day 2024 gipasiugdahan sa Cebu Bamboo Industry Development Council.

Nagtinabangay sa pagtanum sa 1,200 ka dabong nga kawayan ang mga empleyado sa Mandaue City Hall, pribadong sektor, ug mga volunteers.  Gipahinumdom sa katawhan ang kabililhon sa kawayan sa pagtabang sa ekonomiya ug ang pagpanalipod sa kalikupan.

Lakip sa nitambong mao sila si acting Vice Mayor Nerissa Soon-Ruiz uban sa mga City Councilors nga sila si Maline Cortes-Zafra, Oscar Del Castillo, Jen Del Mar, Ceasar Cabahug, Anjong Ouano Icalina, ug Malcolm Sanchez, ingon man ABC President Dante Borbajo ug kanhi ABC President Ernie Manatad.

Nipadayag usab sa ilang suporta ang Executive Director sa Philippine Bamboo Industry Development Council Rene Madarang ug ang Chairperson sa Cebu Bamboo Industry Development Council nga si Melvin Justin Labuca ingon man si Tuburan Mayor Aljun Diamante. (BANAT NEWS)