Drug dens gironda, pito nadakpan

CEBU, Philippines — Duha ka drug dens ang giguba samtang pito ka mga drug personalities ang gidakop ug usa ma menor de edad ang gi-rescue sa managlahi nga anti-illegal drug operations sa Cebu City niadtong Septiyembre 20, 2024, adlaw nga Biyernes.  Sa alas 5 sa hapon ang mga operatiba sa PDEA-7 Regional Special Enforcement Team Charlie uban ang PNP RIU-7 miguba sa drug den sa Sitio Mabapo, Barangay Mambaling, Cebu City diin  upat indibidwal ang gidakop ug usa ka menor de edad ang na-rescue.

Ang nadakpan mao ang subject sa operasyon ug drug den maintainer nga si John David Carcedo, 24, ug tulo ka tigbisitahan sa drug den nga sila si Guvanie A. Alega 33, , ug magsuong sila si Mark Jason P. Bacaresas, 33, ug Mark Jordan P. Bacaresas, 32.

Na-rescue sab ang 15-anyos nga lalake.  Nasakmit sa maong operasyon ang 15 ka putos sa gituohang shabu nga nitimbang og 11 gramos ug gibana-banang mobalor og P74, 800, buy-bust money, kwarta nga P270 ug nagkalain-laing drug paraphernalia.

Samtang sa alas 8:45 sa gabii sa samang adlaw, ang mga operatiba sa PDEA Cebu Provincial Office uban ang Philippine Air Force nagpahigayon og buy-bust operation sa Sitio Bamboo Groove, Barangay Basak San Nicolas, Cebu City nga miresulta sa pagguba sa drug den ug pagdakop sa subject sa operasyon ug drug den maintainer nga si Jessil E. Cariman, 36, ug duha ka tigbisitahan sa drug den nga sila si  Jerick C. Paquera, 30, ug James G. Peñalosa, 29, samtang usa ka Kevin E. Cariman ang nakaeskapo.

Nakuha sa maong operasyon ang unom ka putos sa shabu nga nitimbang og 12 gramos ug mobalor og P81,600, buy-bust money, kwarta nga P90 ug mga drug paraphernalia. (BANAT NEWS)