Pamaagi paglikay sa dengue itudlo sa eskwelahan

CEBU, Philippines — Ilakip sa klase o leksyon sa mga tinun-an ang mga pamaagi ug proactive measure sa kampanya batok sa sakit nga dengue.

Kini ang ipatuman sa bag-ong principal sa Alaska Elementary School sa barangay Mambaling nga si Lunesa Pogoy nonot sa nagsaka nga kaso sa maong sakit sa dakbayan sa Sugbo.

Suma pa ni Pogoy nga tumong niini aron masilsil sa alimpatakan sa mga tinun-an kon unsa ka peligro ang dengue ug kon unsaon kini sa pagpakgang.

Nagplano ang kadagkuan sa tunghaan nga hisgutan kini uban ang mga magtutudlo, ginikanan ug mga tinun-an atol sa ilang himoon nga tigum.

Maoy usa sa sigurohon ang pagpatuman sa kalimpyo sa sulod ug gawas sa tunghaan ilabi na nga duol ra sila sa sapa nga dunay daghang basura.

Gitug-an ni Pogoy nga moabot sa dos mil ang populasyon sa Alaska Elementary School diin maoy gitinguha nga panalipdan ang mga tinun-an.

Segun sa datus sa Department of Health dul-an sa 600 ang kaso sa dengue sa tibuok siyudad ug walo na ang konpirmadong namatay.

Subay niini girekomendar sa Health Department ang pagpaubos sa dakbayan sa State of Public Health Emergency.

Samtang nonot sa pagsaka sa kaso sa dengue si konsehal Eduardo “Digul” Gullas sa dakbayan sa Talisay nihangyo sa mga ginikanan nga pahiran og mosquito repellent ang mga tinun-an sa dili pa moadto sa tunghaan. Matud pa ni Gullas nga makatabang kini aron ang lamok nga nagdala og dengue dili mopaak sa lawas sa tawo.

Andam usab ang iyang buhatan nga mo-coordinate sa anti-dengue task force aron pagtubag sa hangyo sa mga eskwelahan alang sa pagpahigayon og misting. (BANAT NEWS)