Duha ka lalaki nanglayat sa taytayan, naluwas

CEBU, Philippines — Duha ka mga lalaki ang nangambak sa taytayan sa tinguhang magkutlo sa ilang kinabuhi tungod sa ilang mga gihambing problema sa managlahing insidente sa dakbayan sa Sugbu.

Kagahapong adlawa,  kakulian sa panlawas ang nagtukmod sa 19-anyos nga lalake sa pag-ambak sa Guadalupe Bridge sa Barangay Capitol Site. Ang lalaki tinun-an ug residente sa  maong barangay.

Sigon ni Police Captain Mark Eric Papong,  hepe sa Abellana Police Station 2 sa Cebu City Police Office nga alas 6 kagahapon sa buntag  dunay ni report sa ilaha nga dunay tawong niambak sa taytayan kagahapon sa kaadlawon.

Ang ig-agaw sa batan-on mitug-an sa kapolisan nga aduna kini gipamati sa lawas ug naproblema kini. Pagkuha sa mga rescuers sa Cebu City Disaster Risk Reduction and Management Office gidala kini dayon sa Cebu City Medical Center tungod sa mga samad nga naangkon sa ulo.

Gibana-bana nga 10 ngadto sa 15 ft ang gitas-on sa taytayan nga giambakan niini.

Samtang usa ka 34 anyos nga lalakeng adunay tulo ka mga anak ang miambak gikan sa South Road Properties (SRP) viaduct niadtong Domingo sa kaadlawon ug nabangalan sa mananagat sa Barangay Pooc, dakbayan sa Talisay.

Ang lalake residente sa Barangay Mambaling, Cebu City. Sa impormasyon sa Waterfront Police Station 3 sa Cebu City Police Office, mianha sa Plaza sa Katawhan ang maong lalake ug namalihog sa 20-anyos nga batan-ong lalake nga gunitan iyahang cellphone nga adtong higayona naka live na sa Facebook.

Nagtuo lang ang batan-on nga maligo ra kini sa dagat maong iyahang gikuptan ang cellphone apan nakurat kini nga nanamilit kini ug miingon nga ihatag ra iyahang butang sa kinsay mo claim.

Nahadlok pa ang batan-on ug madungog sa video nga gitawag pa niya ang lalaki nga niambak na ngadto sa dagat aron kini pabalikon, apan wala na kini motunga.

Ni-report ang batan-on sa Waterfront Police Station 3 nga daling dayon nila gialarmahan. Ang Philippine Coast Guard(PCG) -7 nagpahigayon og search ang rescue operation apan wala na kini igkita pa.

Apan ang Waterfront Police Station nakadawat og tawag alas 10 kagahapon sa buntag nga dunay nalandig sa Talisay City District Hospital nga nabangalan og mananagat.

Sa pagabot nila didto nakompirmar nga mao kini ang niambak sa viaduct nianang gabii. Ang lalaki mitug-an sa mga polis nga daghan siya og problema ug nakainom siya adtong tungora.  (BANAT NEWS)