Resolusyon ni Guardo pagpintal sa mga eskwelahan nakasugat og kakulian

CEBU, Philippines — Ang gisugyot nga resolusyon ni Konsehal Jerry Guardo sa subling pagpintal sa 83 ka edipisyo sa eskwelahan nga adunay kinatibuk-ang kantidad PP40.4 milyones nakasugat og kakulian sa pag-aproba sa konseho tungod kay wala malakip ang rundown sa mga item sa proposal.

Atol sa regular session niadtong Miyerkules gisugyot ni Guardo kinsa maoy  chairman sa committee on infrastructure sa konseho nga hatagan og pagtugot si Acting Cebu City Mayor Raymond Alvin Garcia nga mopirma og construction agreement alang dakbayan uban sa P.B. Obial Construction, Goldfin Construction and Development Corporation, Ascentia Construction, Inc., ug W. GO Construction and Supply.

Tinguha sa maong proyekto mao ang pagpintal og balik sa mga edipisyo sa Ramon Duterte National High School sa Barangay Guadalupe, Tejero Elementary School ug high school, Tisa Elementary School, Zapatera Elementary School ug National High School, Mabolo Elementary School, ug Punta Princesa Elementary School ug high school.

Ubos sa proposal nga human makompleto ang proyekto itugyan sa kontraktor ngadto sa Local School Board ang talaan sa mga butang nga nagamit sama sa scaffoldings, frame, vests, harnesses, ug clamps nga gi-enumerate sa construction agreement.

Apan tungod sa kakuwang sa hustong breakdown ug detalye sa mga butang nga kinahanglang itugyan ngadto sa kagamhanan sa higayon nga mahuman na ang proyekto gilangan lang una ang pag-abproba sa resolusyon sa maong proyekto ngadto sa usa ka semana.