General Assembly sa mga layko gipahigayon diha sa IEC

CEBU, Philippines —   Dili mominos sa 600 ka mga leaders sa nagkadaiyang Lay Organizations, Movements, Association and Services kon LOMAS ug mga Parish Coordinator nga sakop sa Archdiocesan Commission on the Laity nga gipangulohan ni Fe Mantuhac Barino ang niapil sa gipahigayon nga 3rd General Assembly niadtong Sabado sa buntag sulod sa International Eucharistic Congress IEC.

Atol sa maong tigum gipahigayon ang pipila ka mga kalihukan sama sa talk may kalabutan sa holy spirit gift of the Church, ang report sa Chairnan nga si Barino, diin gituki ang baruganan sa mga layko sa ilang suporta sa sugbuswak, synod consultations ug Lenten recollection ug uban pa.

Gipahibalo usab ang revised Commission on the Laity Statutes diin mismo si Archbishop Jose Palma maoy nipirma niini nga gisaksihan sa tanang nitambong sa maong tigum.

Human sa maong pagpirma gisunod usab ang pag-apod-apod sa Accreditation Certificates nga gipangulohan ni Palma nga giabagan ni Barino lakip ang mga Council Heads.

Ang maong tigum gitak-opan sa usa ka santos nga misa nga gipangulohan ni Palma uban sa mga kaparian sa Archdiocese of Cebu.

Ang arsobispo mapasalamaton kaayo sa dakong papel sa mga layko sa ilang pagtabang sa simbahan pinaagi sa ilang gipaambit nga mga talento.

Ang Arsobispo niawhag sa tanang sakop sa nagkadaiyang grupo nga magdayegay inay magpalabwanay sa usag-usa.

Gidasig sa arsobispo ang mga layko sa padayon lang gihapon sa ilang mga lihok sa pagtabang sa ilang simbahan ug ilabi na ngadto sa kaparian.

Si Barino sa iyang bahin mapasalamaton usab sa tanan nga nahimong parte ug kabahin sa maong malampuson nga kalihukan. (BANAT  NEWS)