DOH ug SM Supermalls mipirma og MOA pagtukod og wellness center

CEBU, Philippines — Nipirma ang DOH ug SM Supermalls og Memorandum of Agreement (MOA) aron magtambayayong sa pagtukod og mga wellness center sa pinili nga mga SM mall.

Ang mga wellness centers ihiusa sa Government Service Express sa SM nga maghatag og importante nga pasilidad sa pag-atiman sa panglawas nga nahimutang sa lugar nga dali ug sayon ra nga maadto sa mga tawo.

Sa pagpangulo nilang DOH Secretary Teodoro J. Herbosa ug SM President Steven Tan, ang panagtambayayong nagtinguha nga mapalambo ang kasayon sa pag-access sa mga serbisyo sa panglawas ug mapausbaw ang maayong panglawas.

Matud ni Secretary Herbosa nagpakita kini og mahinungdanong lakang sa pagtubag sa dili patas nga pag-access sa mga serbisyo sa pag-atiman sa panglawas sa tibuok nasud.  Dugang niya nga pinaagi sa pagpaduol sa mga serbisyo sa mga komunidad, tumong sa DOH ug SM Supermalls nga mas daghang mga Filipinos ang dunay access sa mga pag-atiman nga kinahanglanon nila padulong sa usa ka Bagong Pilipinas diin matag kinabuhi importante.

Kini nga inisyatiba nalakip sa pasalig sa DOH sa 8-Point Action Agenda for Health nga nagtinguha sa paghatag og kalidad nga serbisyo sa panglawas alang sa matag Filipino, komunidad, ug matag health worker ug institusyon.