Hupo-hupo nga tourist guide nidagsang sa Lapu-Lapu

CEBU, Philippines — Namatikdan karon ang pagdagsang sa mga dili lihitimo nga tour guide sa Siyudad sa Lapu-Lapu kinsa giila nga mga "Hupo-Hupo".

Nasayran nga pipila sa maong mga tour guide ang magdumili sa pagbayad sa environmental fee nga P100 nga gikolekta sa kagamhanan sa siyudad subay sa gipatuman nga ordinansa nga ang kitaon niining salapi dako kaayo og kapuslanan sa mga gihimong programa nga naglakip sa pagpalambo sa tukmang paghipos sa mga basura.

Si Lapu-Lapu City Tourism Officer Gary Lao ang nipasiugda sa nahisgutang tigom nga gitambongan sa mga tourism stakeholder ug opisyales sa siyudad ug Department of Tourism (DOT)-7. Sa maong tigom ilang gituki ang upat ka nag-una nga mga isyu nga naglakip sa city tourism accreditation, koleksiyon sa environmental fees, environmental conservation and sustainability ug kalamboan gikan sa buhatan sa DOT-7.

Ang mga establisamento nga nalambigit usab sa turismo  ang ilang mga negosyo sama  sa mga beach resort, hotel ug uban pa ang nipadayag usab sa ilang mga maayong huna-huna alang sa pagpalambo sa kahimtang sa turismo sa siyudad nga maoy nag-unang panginabuhian sa mga molupyo niini. (BANAT NEWS)