Rightsizing sa mga kawani ipatuman ni Garcia

CEBU, Philippines — Acting Cebu City Mayor Raymond Alvin Garcia nibutyag atol sa flag raising kagahapon, Lunes sa buntag nga adunay rightsizing sa gidaghanon sa mga empleyado sa City Hall.

Matud pa ni Garcia, adunay himoon nga pakisusi pinaagi sa iyang team nga mugnaon kung kinsa nga mga trabahante ang angayan nga i-renew.

Nagkanayon si Garcia, base sa iyang pagsubay-subay aduna usab siyay mga trabahante nga nakita nga wala ra gayud maglihok sa ilang mga trabaho.

Gitahasan na sa acting mayor ang HRDO ug mga pangulo sa departamento sa City Hall nga moduso ug report kabahin sa ilang mga sakop ug apil niini kun ang maong mga kawani malugwayan ba ang ilang mga kontata o dili.

Si Garcia nibutyag nga ang iyang mugnaon nga Evaluation Committee maoy motan-aw sa mga trabaho sa regular, casual ug job order nga trabahante.

Subay niini gipahimangnuan sa acting mayor ang mga kawani nga magtarong sa ilang mga trabaho. (BANAT NEWS)