Dakbayan sa Sugbo nakadaginot og P235milyones sa pag-host sa Palaro

CEBU, Philippines — Dul-an sa P235 milyones ang na save sa kagamhanan sa Dakbayan sa Sugbo atol sa pag host sa siyudad sa Palarong Pambansa 2024 nga gipahigayon niadtong Hulyo 6 ngadto sa 16.

Atol sa press conference kagahapon gibutyag ni acting Cebu City Mayor Raymond Alvin Garcia nga sa P405 milyones kapin nga giaprobahan sa konseho nga pundo sa palaro gikan sa Annual Budget ug Supplemental Budget o SB 1 niabot lang 171 milyones kapin ang nagasto gikan sa duha ka tinubdan.

Sumala pa ni Garcia nagpasabot kini nga nakadaginot ang siyudad ug mopadulong kini ngadto sa Supplemental Budget number 2 nga giduso na usab karong panahona.

“Despite nga dako kaayo tag savings, successful gihapon ang atong pag host, di man diay ta kinahanglan nga dako kaayog gastuhon para ma successful atong palaro,” suma pa ni Garcia.

Kahinumduman dihang niasumir si Garcia isip acting mayor iyang gimando ang pagsuspend sa tanang procurement activities sa hosting sa Palarong Pambansa 2024 ug midesisyon nga ibanan ang overall budget ngadto na sa dili mominus sa 36 porsyento. (BANAT NEWS)