Motor sa mga tulisan na-recover

CEBU, Philippines — Narekober sa kapulisan sa Siyudad sa Sugbo ang usa mga motorsiklo ug gisusi pa usab ang giingong usa ka SUV nga gituohang usa sa gigamit sa mga tulisan nga nanulis sa duha ka jewelry stores sa F. Calderon Street, Barangay Ermita, siyudad sa Sugbo niadtong Huwebes sa buntag.

Si Police Major Philip Libres, hepe sa Carbon Police Station 5 nga ang maong motorsiklo usa sa mga gihulagway sa crime scene nga gisakyan sa mga tulisan.

Gikustodiya kini sa kapulisan ug ni-request na sila og macro-etching sa Regional Forensic Unit-7 sa motorsiklo ug mo-request sab sila sa Land Transportation Office(LTO)-7 aron mailhan kinsa ang tag-iya sa motorsiklo apil ang pula nga helmet nga na rekober alas-2 sa kaadlawon kagahapon adlaw nga Biyernes diha sa P. Burgos Street, Barangay Sto. Niño.

Gawas pa niini, gibiyaan nga nagtangag pa ang yawe sa maong motor, duna kini improvised plate nga karton nga gisuwatan sa vehicle file no. nga 0701-00000-510880 isip temporaryong plaka.

"Kagahapon nag focus ‘ta sa mga CCTV camera nga posible didto agi ang exit motorcycle or vehicle then pagka gabie na naa tay nakita motor didto nga siya nalang usa. So, atong gitan-aw then gi-compare nato sa katong nakuha nato sa video sa pawnshop so naa siya'y similarities kuan gyud siya nga usa siya sa gisakyan sa mga nanulis," sigon ni Libres.

Parking Ticket

Base sa parking ticket nga nakuha nila 11:45 sa buntag sa adlaw'ng Huwebes ninaog ang mga sakay sa motorsiklo, ang usa nilakaw unya ang laing usa nilabang.  Kini maoy gisubay karon sa kapulisan kung asa nisakay o gi pickup og sakyanan sanglit ang nilabang maoy nagdala og bag.  Ang mga ninaog sa motor nagsuot mask unya naka sweatshirts.  Dili pa makasulti ang kapulisan kung local o dayo ang mga tulisan apan ang ilang gihimo sa duha ka pawnshop susama sa nahitabo sa Oro Sugbo nga gitulis niadtong buwan sa Nobyembre sa miaging tuig.

Gihulagway sa kapulisan nga planado ang pagpanulis sa mga tulisan sa duha ka pawnshops.

Tibuok pwersa sa kapulisan sa Police Regional Office-7 ang nagtutok sa maong krimen ug pagkutlo ning maong balita wala'y na monitor ang kapulisan nga nakagawas na sa Sugbo ang mga tulisan.  Gani ang ubang ahensiya sa gobyerno nitabang man sab sa imbestigasyon.

Moabot sa unom ngadto sa walo ka mga tulisan ang naghimo sa maong pagpanulis.

P100 Mil Reward

Sa pikas bahin, nitanyag og P100 mil nga pasiunang ganti si acting Mayor Raymond Alvin Garcia sa tawong makahatag og impormasyon bahin sa mga tulisan.

Matud pa ni Garcia, gikan kini sa iyang kaugalingong bulsa ug daghan pang mga magpapatigayon ang nitawag kaniya nga andam usab kini mohatag og reward para sa pagkasikop sa mga tulisan.

Sumala pa ni Garcia, base sa iyang nakuhang impormasyon gikan sa kapolisan aduna nay nailhan nga duha ka miyembro sa maong grupo, duna nay motor nga na-recover ug aduna say SUV nga gituohang gigamit sa maong krimen nga padayun pa usab nga gisubay sa kapolisan atol ning pagsuwat sa balita.

48-Oras Ultimatum

Samtang gitug-an ni Garcia nga seryoso siya sa iyang 48-oras nga ultimatum ngadto kang acting City Police Director Col. Antonieto Cañete kay nakataya dinhi iyang pangalan ug tsansa nga mamahimong permanenteng direktor sa CCPO.

Atol sa pagbisita sa Banat News/DyRF1215 usa sa mga jewelry shops nga gitulis, nangabli na kini pag-usab ug puno gihapon og display nga mga alahas ang ilang mga estante. Apan sa gihapon, walay gwardiya nga nagbantay sama sa adlaw nga sila gitulis ug nasakiyo ang gibanabanang P10 milyones nga balor sa mga alahas.

Samtang ang security guard sa ikaduhangf jewelry store nga nakuhaan og balor P4 milyones nga alahas nibutyag nga naniudto siya adtong panahona sa dihang nangabot ang mga tulisan ug wala siya nakaalma kay gidiretso siya og pahapa ug nideklarar og tulis.

Matud niini, dunay mga armado sa sulod ug duna sad sa gawas nga nagsilbing lookouts.

Sa laing bahin, si Mayor Jonas Cortes sa Mandaue City miawhag sa mga magpapatigayon nga pahugtan ilang seguridad ug magmuntar gyud og mga functional nga CCTV  cameras sa ilang establisamento.

Agi kini og reaksyon sa mayor human sa nahitabong tulis sa duha ka mga pawnshops sa Cebu City. Matud sa mayor makatabang kini sa pagsulbad sa krimen ug sa pag-ila mga responsable. Rowena D. Capistrano ug Romeo T.  Limpangog, IBM BANAT NEWS