Motor ug awto gidaro og SUV, usa patay, duha angol
CEBU, Philippines — Usa ang patay samtang duha ang nangaangol human aksidente silang gidaro og usa ka SUV diha sa Veterans Drive, Maracas, Barangay Lahug, siyudad sa Sugbo alas pasado alas 11 sa gabii sa adlaw'ng Huwebes.
Ang nakalas mao si Honorio Giltendez Pescador, 62, habal-habal driver, ug residente sa Imahen Compound Rivaridge, Barangay Tisa ning siyudad.
Samtang ang mga naangol mao sila si Lea Mae Bonocan, 24 anyos, ug Christine Faran, 23 anyos, nagpuyo sa Lower Britania Hills. Ang duha mga pasahero ni Pescador anang tungora.
Ang driver sa nakadasmag nga SUV mao si Belarmino Canillo Birao, 57, nagpuyo sa Tubod, dakbayan sa Toledo.
Nagkanayon si Police Lieutenant Colonel Miguel Andeza, hepe sa Traffic Enforcement Unit sa Cebu City Police Office, ang habal-habal padulong maghatod sa duha niya ka mga pasahero diha sa may Britania, Barangay Lahug.
Patungas matod pa ang habal-habal ug gasunod kini sa Toyota Wigo nga sakyanan nga adunay mga sakay nga mga babaye. Samtang ang SUV nga nakabangga kanila padulhog ug ilaha kining kasugat.
Base sa imbestigasyon, gikatahong nawagtangan matud pa og brakes ug clutch control ang driver sa SUV ug una niining nabanggaan ang nag-una nga Toyota Wigo dayon naigo sab niini ang habal-habal nga gasunod.
Kasong reckless imprudence resulting in multiple physical injuries, homicide with multiple damage to properties ang kasong atubangon sa driver sa SUV. Rowena Capistrano, IBM BANAT NEWS
- Latest
