Cebu City mag-umol og TWG alang sa pagtukod og gabion dams

CEBU, Philippines — Ang konseho sa Dakbayan sa Sugbo ni-aproba sa ordinansa sa pag-umol og technical working group (TWG) alang sa pagtukod og gabion dams sa siyudad.

Ang nahisgotang ordinansa nag-ulohan og “An Ordinance Mandating the Creation Of A Technical Working Group For The Conduct Of Research, Design, Build, And Establishment Of Gabion Dams Or Other Water Impounding or Recharging Facilities, as a water resource for strategic sites within the territorial jurisdiction of the City of Cebu, and Providing A Budgetary Allocation for the purpose”.

Ang maong ordinansa gi-author nila ni Konsehal Nestor Archival, Sr., Joy Young, Jocelyn Pesquera ug Joel Garganera.

Atol sa ikatulong pagbasa si Archival nagkanayon nga adunay pipila ka rason nga kinahanglang maaprobahan ang maong ordinansa.

Lakip niini mao ang pagsiguro sa sustainable water management pinaagi sa paghimo sa mga pasilidad sa pagpundo og tubig aron adunay igong supply alang sa umaabot nga mga panginahanglanon ug aron usab mamenosan ang baha sa siyudad.

“Gabion dams and similar structures promote environmental resilience by controlling erosion, improving water quality, enhancing biodiversity”, matud ni Archival atol sa ikatulong pagbasa sa ordinansa niadtong Agosto 7, 2024.

Gawas niini, naghatag usab kini og seguridad sa tubig sa mga komunidad ilabina sa panahon sa huwaw. Ang nahisgutang ordinansa naglatid usab nga ang Dakbayan sa Sugbo nakasinati karon og krisis sa tubig nga nipasamot sa padayon nga saltwater intrusion.

"Aside from the Buhisan Watershed, the City of Cebu has no other watershed or water dams built as a viable source for water production to address the high demand for water supply in the city", tipik sa ordinansa.

Ang maong TWG langkuban sa hepe sa Department of Engineering and Public Works isip ex-officio chairman, head sa City Planning and Development Office isip ex-officio vice chairman.

Ang mga miyembro langkuban usab sa chair sa committee on transportation, communication, and utilities, chair sa committee on infrastructure, head sa Central Cebu Protected Landscape ug board member sa Metropolitan Cebu Water District (MCWD). BDB BANAT NEWS