P2.5B balor sa ilegal nga drugas nasakmit sa PRO-7 sulod sa duha katuig

CEBU, Philippines — Gitinguha sa Police Regional Office (PRO)-7 nga mahimong drug cleared ang tanang Barangay sa Central Visayas sa dili pa matapos niining tuiga 

Base sa datos sa PRO-7 anaa na sa 71 porsyento nga mga barangay sa rehiyon-7  ang nadeklara nga drug-cleared sa Regional Oversight Committee.

Nikabat ngadto sa P2.5 bilyones nga balor sa ilegal nga drugas ang nasakmit sa kapolisan sa Central Visayas gikan sa Hunyo 30, 2022 hangtud sa Hulyo 31, 2024.

Ang P2.5 bilyones nga balor sa drugas resulta kini sa 14,033 ka operasyon batok sa ilegal nga drugas diin 17,059 ka indibidwal ang nasikop ug niabot sa 369,698.90 gramo nga shabu ang nasakmit.

Gipasalig ni PRO-7 Regional Director Police Brigadier General Anthony Aberin nga ang problema sa ilegal nga drugas sa rehiyon ilang gitutokan ug ang mga aksiyon nga ilang nahimo nakatampo sa pagkunhod sa supply sa drugas.

Gihingusgan nila ilang kampaniya batok ilegal nga drugas ilabi na sa Sugbo tungod kay giila kini nga major transhipment point alang sa drug distribution.

Apan giklaro ni Aberin nga ang mga drugas nga nasakmit dili gikan sa Sugbo apan gipalusot lang kini gikan sa Luzon ug ipang-apod-apod sa Mindanao.

Lakip sa datos sa PRO-7 nga niabot og 62,347 ka suspetsado nga nalambigit sa nagkalain-laing krimen sa tibuok Central Visayas.

Nadakpan sa kapolisan ang 27,651 ka tawo nga nalambigit illegal gambling diin P3.3 milyones nga kwarta ang nasakmit.

Sa wanted persons nakasikop ang kapolisan og 2,206 ka most wanted persons ug 13,457 ang other wanted persons.

Samtang sa loose firearms, 11,244 ang nakompiska ug 1,973 ang nadakpan.

Samtang sa Oplan Katok, ang kapolisan naka-recover og 2,689 ka armas, 334 explosives ug 2,818 ka bala.

Sa laing bahin, 115 na ka drug suspects ang nasikop sa 65 ka operation kalabot sa ilegal nga drugas sulod lang sa 100 ka adlaw sa paglingkod isip pangulo sa Talisay City Police Station ni Police Lieutenant Colonel Epream Paguyod.

Nasikop ang 115 ka individuals nga nalambigit sa pagpayuhot ug ilegal nga drugas.

Samtang sa ilegal nga sugal nipahigayon sila og 49 ka operasyon diin sa 101 ka tawo ang nasikop, 45 ang nasikop kalabot sa loose firearms, diin 31 ang nasakmit nga armas. (BANAT NEWS)