Archival nipadayag sa iyang ka-lineup sa 2025 election

CEBU, Philippines — Si Konsehal Nestor Archival sa Dakbayan sa Sugbo kinsa nipahibalo na sa iyang pagdagan isip mayor sa siyudad karong midterm elections nagkanayon nga adunay mga sakop sa Bando Osmeña Pundok Kauswagan ang modagan ug iyaha na usab nga ipahibalo.

Matud ni Archival nga mahimo niyang ka tandem mao si kanhi mayor Tomas Osmeña nga modagan isip bise mayor samtang sa north district representatives mao si Mary Ann Delos Santos ug Rodrigo “Bebot” Abellanosa sa south district.

Gibutyag ni Archival ang mga modagan isip konsehal sa north district mao sila si Alvin Arcilla, Alvin Dizon, Sisinio ‘Bebs” Andales, Jingjing Cadungog, samtang sa South district sila si Joe Abellanosa, Ian Osmena, Jr. Pepito ug Paul Labra.

Adunay posibilidad usab nga malakip si Jun Gabuya ubos sa partido sa BOPK.

Giklaro ni Archival nga iyang gipili si Osmeña isip iyang running mate tungod sa iyang halapad nga kasinatian sa liderato.

Ug gihatagan niya og gibug-aton nga gitugyanan siya ni Osmeña sa suporta ug pagsalig sa iyang abilidad sa pagserbisyo isip sunod nga mayor sa siyudad.

Dugang ni Archival nga dako siya og pasalamat sa kanhi mayor sa pag-ila sa iyang daghang tuig nga pagserbisyo isip konsehal. BDB BANAT NEWS