Cebu City 80 porsyento na nga andam pagpatuman sa PTMP

CEBU, Philippines — Si Konsehal James Anthony Cuenco, chairman sa committee on transportation sa Cebu City Council nagkanayon nga 80 porsyento na nga andam ang Dakbayan sa Sugbo alang sa pagpatuman sa nationwide Public Transportation Modernization Program (PTMP).

Matud ni Cuenco nga dili kini mahimo kong dili makompleto ang Local Public Transport Route Plan (LPTRP) nga nagpabiling pending tungod kay wala pa mahuman ang mga rota sa Cebu Bus Rapid Transit (CBRT).

Kagahapon nagpahigayon og unity walk ang Federation of Cebu Transport Cooperatives ug Allied Transport Cooperatives diin nanawagan sila sa pagsupak sa Senate Resolution No. 1096 nga nagtinguha sa pagsuspenso sa pagpatuman sa PTMP.

Si Cuenco nagkanayon nga suportado nila ang ang panawagan sa maong transport groups apan ang panawagan alang sa pagsuspenso sa PMTP uwahi na.

“Daghan naman gud naka comply sa law. As a matter of fact in Cebu City more than 90% na, and I really believe that it is unfair, masakripisyo ang status aning mga ni-comply, and you know, the modernization program has been suspended so many times before”, ni Cuenco pa. Matud usab ni Cuenco nga mas maayo unta nga sa panahon nga gisuspenso ang pagpatuman niini aduna nay gihimo nga remedy sa maong sitwasyon ug ang modernisasyon usa ka epektibo nga programa.

Sa gipahigayong diyalogo uban sa Land Transportation Franchising and Regulatory Board (LTFRB), si Cuenco nagkanayon nga ang ilang gikabalak-an mao ang mga nisupak sa modernization.

Gibutyag ni Cuenco nga hangtud karon nagbayad pa sila sa amortization sa mga sakyanan nga gi-invest aron sa pagpatuman sa modernisasyon ug aduna kini mga backlog nga interest rate ug maglisod na sa pagbawi ang mga transport group.

Naglakip sa mga hinungdan nga nadugay ang pagpatuman sa modernisasyon mao ang wala mapatuman nga LPTRP tungod kay wala pa kini mahuman tungod sa wala pay kasigurohan nga mga rota sa BRT.

“I say we are 80% ready. But mao lagi ang problema nato sa Cebu City is the approval of the LPTRP. Without the LPTRP we cannot be 100% ready”, matud ni Cuenco. Dugang ni Cuencon nga ang LPTRP nga giandam ngadto sa transport groups usbon pa tungod kay wala pa mahuman ang mga rota sa BRT. (BANAT NEWS)