DTI nag-monitor na sa presyo sa school supplies

CEBU, Philippines — Ang Department of Trade and Industry nagsugod na sa pag-monitor sa presyo sa school supplies diin pipila nalang ka adlaw sa mobukas na ang klase sa school year 2024-2025.

Ang Chief Trade Industry Development Specialist sa Consumer Protection Division sa DTI Cebu Province Ines Cajegas nagkanayon nga nisugod na sila sa pag-monitor sa back to school necessities sa unang semana sa Hulyo niining tuiga.

Matud ni Cajegas nga ang DTI central office adunay gipagawas nga giya sa pagpamalit nila og school supplies ug giklaro usab niini ang guide dili susama sa suggested retail price tungod kay ang SRP nag-refer kini sa presyo nga nakabutang sa pipila ka items.

Gatusan ka items ang nakalista sa giya nga presyo ug ang DTI naglaom nga makatabang kini sa mga konsumidor sa ilang pagpamalit sa items nga naglangkub sa notebooks, lapis, pad papers, balloons, erasers, sharpener, crayons ug ruler.

Ang DTI nagkanayon nga sa pagpamalit sa mga papel angayan nga tan-awon sa konsumidor ang kinatibuk-an nga ihap sa papel, unsay klase, asa gikan ug susama usab niini ang ubang palaliton sama sa crayola kong aduna ba kini pagtugot sa Food and Drug Administration.

Giklaro ni Cajegas nga adunay abunda nga supply nga makita sa mga school supply sa mga tindahan sa downtown area sa Dakbayan sa Sugbo.  Ug adunay pipila ka mga presyo sa items nga nisaka apan dili hinuon kaayo dako diin tungod kini sa inflation apan giklaro usab niini nga ang gibaligya sa school supplies stores kay anaa sa ubos nga presyo subay sa tamdanan.

Hinuon wala pay na-monitor nga tindahan ang DTI nga nag-overpriced sa ilang items subay sa ilang gipahigayon nga monitoring period sayo karong buwana ug wala usab sila’y nadawat nga reklamo. Sa laing bahin, gisugdan na ang Brigada Eskwela 2024 sa pampublikong tunghaan sa Dakbayan sa Talisay niadtong Lunes.

Usa ka mubo nga programa ang gihimo diha sa Talisay City National High School nga gitambongan sa opisyales sa barangay, Armed Forces of the Philippines, Bureau of Fire and Protection, mga magtutudlo ug ginikanan.

Gihimo kini aron ang mga tunghaan presentable ug hamugaway na nga gamiton sa mga tinun-an sa pagsugod sa klase karong Hulyo 29, 2024. (Gabriel C. Bonjoc/BDB) BANAT NEWS