Mga polis ipakatap atol sa bar exam, mga residente giawhag dili magsaba

CEBU, Philippines — Andam na ang Cebu City Police Office (CCPO) sa umaabot nga ikatulong Regionalized 2024 Bar Examinations sa Siyudad sa Sugbo.

Matud ni Police Lieutenant Colonel Janette Rafter, deputy city director for administration sa Cebu City Police Office (CCPO) nga tulo ka adlaw ang maong regionalized bar examinations.

Ipahigayon kini karong Domingo, Septiyembre 8; adlaw’ng Miyerkules, Septiyembre 11, ug sa Septiyembre 15, adlaw usab nga Domingo.

Nasayran nga usa na lang ka eskwelahan ang venue sa bar examinations nga mao ang University of San Jose Recoletos-Basak Campus itandi sa niaging tuig nga tulo ka tunghaan ang gipahigayonan.

Matud usab ni Rafter nga 70 ka police personnel ang ipakatap sulod ug gawas sa testing center.

Kaabag sa kapolisan sa pagbantay sa seguridad ang ubang ahensiya sa gobiyerno sama sa Cebu City Disaster Risk Reduction and Management Office (CCDRRMO), Cebu City Transportation Office (CCTO), Bureau of Fire Protection (BFP) ug uban pa.

"Naa ta’y gi-expect nga 1,200 bar examinees for this day but again the number will be define on the day of the examinations", matud ni Rafter.  Adunay portion sa dalan duol sa USJ-R Basak Campus ang siradohan pila ka oras aron paghatag og dalan sa examinees.

Alas 2:00 sa kadlawon sugdan og deploy ang kapolisan diin ang overall supervisor mao si Police Lieutenant Colonel Maria Theresa Macatangay, deputy city director for operations samtang si Police Major Jeciree Basitao, hepe sa Inayawan Police Station ang ground commander.

Nunot niini, si Kapitan Dave Tumulak sa Barangay Basak Pardo nagpahigayon og rekorida nga dili magsaba-saba sa mga petsa nga dunay ipahigayon nga bar exams diha dapit sa USJ-R Basak Campus.

Ang rekorida gipahiayon diha sa mga residente sa mga sitio nga gilangkuban sa Bamboo, Ulap, Baskio ug Kalikasa nga maoy duol sa USJ-R.

Ang mga residente sa maong mga sitio giawhag nga dili una magsaba-saba o magpatukar og kusog atol sa pagpahigayon sa bar examinations. Rowena D. Capistrano/BDB BANAT NEWS