Zhao di consultant sa siyudad-Chan

CEBU, Philippines — Hugot nga gihimakak sa Mayor sa Lapu-Lapu City nga si Junard “Ahong” Chan ang Identification Card nga nagpakita nga Shouqi Zhao isip consultant sa Chinese Business Promotions sa City Mayor’s Office kay matud pa niya peke kini.

Gihimakak ni Chan nga si Zhao gi-appoint niya nga consultant. “We don’t have a record that we hired (him) as a consultant, as I said, we will not issue ID if you are hired as consultant, only the employees of the local government in Lapu-Lapu,” matud ni Chan.

Sumala pa niya  peke ang ID nga nakuha kang  Zhao.

 “It’s easy to get an ID, it’s just only a plastic, sayon ra kaayo paghimo og ID. It’s fake,” matud pang Chan. Sumala pa niya ang empleyado ray isyuhan og ID samtang kontrata sa mga consultants, ug wala niini si Zhao.

 Gidugang pa ni Chan nga sayon ra kaayo paghimo og ID kung itandi sa fake documents ug passports nga gihimo sa na-dismiss nga mayor sa Bamban nga si Alice Guo.

“In fact, atong nadunggan, atong i-connect sa kang Alice Guo na gihimo, nahimo man gani to nila ang birth certificate, nahimo gani nila ang passport, how much more kung ang ID ang atong buhaton. Bisan kinsa siguro makahimo og ID, pwede masunod diba?” sigon pa niya. Nagtuo si Chan nga ang pagpaningkamot ni Zhao sa pag-establisar og koneksyon sa gobyerno ug kaniya gihimo kini aron makakuha og pagsalig ug pagtukod og reputasyon aron gamiton sa iyang katuyoan.  “Dili gyud na mapugngan nga naay mga ingon ana nga mga foreigner nga magpaduol nato… Posible nga gamiton nila para ingon ani ko, aron maimpluwensyahan ang uban nga foreigner nga mao ni saligan ko, mao ni mao na, posible ingon ana,” esplikar pang Chan. Sumala sa mayor nga ang mga donasyon gikan ni Zhao para sa siyudad ug sa mga lokal nga mga eskwelahan pagpakita kini sa naulahi nga legal ang iyang negosyo.

Gani niadtong 2019 pa matud pa nagsugod ang grupo ni Zhao pagnegosyo diha sa siyudad apan  nag-operate sila nga transparent ug pinasubay sa balaod. Wala sab silay nakitang problema kun modonar kini.

Giangkon hinuon ni Chan nga wala na siya mahinumdom kun unsang tuiga sila unang nagkaila  ni Zhao, apan nagtuo siya nga nahitabo kini sa dihang nahimo na siyang mayor sa Lapu-Lapu City.

 “So, syempre the usual, all the tourism stakeholders will do courtesy call for the new elected mayor because that time, mao nay akoang paglingkod isip mayor,pag ila-ila, nagpahigayon og negosyo niining lugara so tanang mga negosyante they are welcome to come to my city, to my office, as long as you do legal business not illegal,” matud pa ni Chan.

Sa pagpatuman sa search warrant sa National Bureau of Investigation sa Central Visayas  (NBI-CEVRO) sa mga lawak ug sa nahibiling gamit diha sa Tourist Garden Hotel  diin nasakpan ang gituohang Philippine Offshore Gaming Operator (POGO) hub niadtong Septiyembre 5, 2024, adunay nakuhang mga gadgets ug mga computers nga gituohang gigamit sa maong ilegal nga operasyon.

 “The examination will make sure that they will prove that there is a POGO operation here,” ingon ni Atty. Dominador Cimafranca, assistant regional director sa NBI-CEVRO.

Nakuha gikan sa mga kuwarto sa Building 5 mao ang 93 ka laptops, 216 ka mobile phones, 61 ka SIM cards, 18 ka desktop computers, 8 ka routers, ug 4 ka modems.

Dugang pa, aduna pud  51 ka identification cards, 26 ka notebooks, usa ka money counting machine, ug usa ka safety vault ang nakumpiska.

Nakuha usab ang nagkalain-lain nga mga kwrta, lakip ang Philippine pesos nga nagkantidad og Php 31,805, Indonesian Rupiahs nga 80,000, ug 15,100 Myanmar Kyats. Padayon pa sab ang imbentaryo sa mga butang nga nakuha sa laing kuwarto sa Building 3.

Ang resort nga dunay 10 ka estraktura ug 12 ka mga sakyanan gipaubos na sa Asset Preservation Order subay sa mando sa Anti-Money Laundering Council.

Niadtong Septiyembre 3, sa alas 11 sa gabii natapos sa Bureau of Immigration (BI) pagpasaka sa mga kasong kriminal kaso batok sa 169 ka mga langyaw nga nadakpan sa resort tungod sa ilegal nga pagtrabaho dinhi nga walay mga dokumento ug balidong work visa.

Ang 16 nila gikasohan sab og paglapas sa R.A. 9208, ang “Anti-Trafficking in Persons Act of 2003.”

Duha ka mga indibidwal nga adunay apelyido Zhao nasuta nga manag-mahan  ug gitumbok nga maoy nagdumala sa operasyon sa maong lugar. “Documentary and testimonial evidence prove that they were actively operating this kind of business,” matyud pa sa direktor sa NBI-CEVRO Renan Augustus Oliva.  Sa mga Facebook post gikan sa account sa mayor sa Lapu-Lapu, si Zhao Shouqi mao ang presidente sa Tourist Garden Hotel ug Presidente sab sa Lapu-Lapu City Chinese Guild. Sa post niini Septiyembre 19, 2023, gipadayag ni Chan ang iyang pagpasalamat sa usa ka social media post sa donasyon ni Zhao nga 22 ka computer units nga gibutang karon sa e-Library sa syudad.

Sa laing post sa mayor niadtong Pebrero 13, 2020, gipasalamat usab ni Chan ang Lapu-Lapu City Chinese Guild sa pagdonar og 18 ka computer units nga gigamit karon sa Lapu-Lapu City Police Office ug sa Pangan-an Elementary School sa Olango Island.

Sa Nobyembre 28, 2020, gibutyag ni Chan nga ang Tourist Garden Hotel ug Lapu-Lapu City Chinese Guild midonar og upat ka solar panels ug tulo ka computer units para sa lokal nga mga eskwelahan. Mitambong sab ang mayor sa Spring Festival Gala Party para sa Chinese New Year sa Tourist Garden Hotel niadtong Enero 22, 2020.-Kristin De Dios ug Jonnavie Villa/IBM