PRO-7: P2.4 bilyon illegal nga drugas ang nasakmit
CEBU, Philippines — Gipahibawo sa Police Regional Office(PRO)-7 nga sukad sa paglingkod ni President Ferdinand Marcos Jr. sa katungdanan hangtod ning tungura niabot sa P2.4 bilyones nga balor sa illegal nga drugas ang nakompiskar sa kapulisan sa Central Visayas.
Sigon ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin indikasyon kini sa kaagresibo sa ilang pakigbatok sa problema sa illegal nga drugas.
Midugang si Lt. Col. Pelare nga miresulta sab kini sa pagkasikop sa mga drug suspects nga niabot og dul-an sa 17,000 ka indibidwal. Gibutyag sab sa opisyal nga nakatala ang PRO-7 og conviction rate nga 99 percent.
"Paghuman og dakop sa drug personalities what we do is we file cases, we go to courts to lodge complaints, mosumbong ta sa husgado, kining sa gidaghanan sa atong gidakop 99 porsyento niini ang nakombikto and most of this people they availed of plea bargaining agreements meaning to say they have immediately pleaded guilty, niangkon dayon sila sa ilang sala," matud ni Lt. Col. Pelare.
Nagpakita matud pa kini nga ang operasyon sa kapulisan duna gyu'y mga ebidensya nga nakuha sukwahi sa alegasyon kaniadto nga ang operasyon sa kapulisan wala nasubay sa balaod.
"Imagine we have 99 percent conviction rate, these the courts telling us that yes the operations of the police are correct, are legitimate," sigon ni Pelare.
Gipasigarbo sab ni Pelare nga sa 3,003 barangays sa Central Visayas 71 percent niini gideklarar nga drug cleared.
Nagpasabot kini nga wala lang sila gabase sa pila ka buok nga nadakpan, pila ka shabu ang nakompiskar apan pila ka barangay ang nadeklarar nga drug cleared. -- IBM BANAT NEWS
- Latest
