POGO gi-ban ni Pangulong Marcos

CEBU, Philippines — Gimando ni Presidente Ferdinand Marcos Jr. atol sa iyang ikatulong State of the Nation Address (SONA) kagahapon ang pag-ban na sa Philippine offshore gaming operators (POGO).

“Effective today, all POGOs are banned,” matud pa sa presidente nga gisugat og masipang pakpak sa mga nitambong sa SONA ilabi na sa mga miyembro sa Kongreso, gani namarog sila sa ilang lingkuranan ug miabiba paglitok og "BBM! BBM!"

Sumala pa ni Marcos nakadungog siya sa singgit sa mga Pilipino mao nga kini ang iyang desisyon.

"Disguising as legitimate entities, their activities have ventured into illicit areas, furthest from gaming, such as financial scamming, money laundering, prostitution, human trafficking, kidnapping, brutal torture, and murder," matud pa ni Marcos.

Gihulagway niya ang POGO nga nitamay ug niabusar sa mga balaod sa nasud maong kinahanglan na kining pahunongon.

Gimandoan ni Marcos ang Philippine Amusement and Gaming Corporation kutob sa bulan sa Disyembre aron hingpit nga mapahunong kining POGO dinhi sa nasud.

Gimandoan sab niya ang Department of Labor and Employment nga tabangan ang mga Pilipinong nagtrabaho sa POGO nga maapektahan sa pag-ban niini dinhi sa nasud.

Dihang nagsugod ang operasyon sa POGO dinhi sa nasud sa panahon sa kanhi administrasyong Duterte, daw naablihan ang nasud sa tanang matang sa mga kalihokan sa mga kriminal nga dala sa mga Chinese nationals nga nadiskubrehan sa dihang gipangronda ang POGO complex sama sa human trafficking, prostitution, torture ug uban pa.

Maisip nga na-pressure si Marcos pag ban sa POGO sukad nga naukay ug napublikar sa imbestigasyon sa Senado ang daghang mga ilegal nga nahitabo sa sud sa ilang operasyon ug mga  nisakay nga krimen ug paglapas sa balaod sama sa pekeng birth certificates nga gigamit sa mga Chinese ug ubang foreign nationals aron sila magpakaaron-ingnong mga Pilipino u gang pagkabisto ni suspended Bamban, Tarlac Mayor Alice Guo kinsa gidudahang espiya sa gobiyerno sa China.

Una niini, silang Senador Sherwin Gatchalian, Risa Hontiveros ug Aquilino Pimentel III nangusog sa pagawhag kang Marcos nga i-ban ang POGO.

Ang Department of Finance (DOF) ug National Economic and Development Authority nakauyon sa pag-ban sa POGO. Sumala pa sa DOF sukad gitugtan ang POGO dinhi P99.5 bilyones kada tuig nawala sa Pilipinas.

Sa wala pa gitugtan sa panahon sa administrasyong Duterte ang POGO didto kini nag-operate sa nasud sa Myanmar, apan tungod sa kinilo-kilong ilegal nga drugas, tortures, kidnappings, human trafficking ug uban pang krimen nga nag-uban sa operasyon niini, nakadesider silang i-ban kini sa ilang nasud.