TRA nga tukoron butangan og modern comfort rooms

CEBU, Philippines — Butangan og modern ingon man “tech-enabled” nga mga pansayan ang unang napulo ka Tourist Rest Area (TRA) nga itukod sa Probinsya sa Sugbo.

Ang Kapitolyo makig-alayon sa usa ka pribadong kompaniya nga maoy modumala sa maong mga rest rooms aron mas limpyo ug komportable ang mga turista nga mogamit niini.

Atol sa tigom ni gobernadora Gwendolyn Garcia uban sa Mister Loo Philippines (MPL) co-founder nga si Dominik Schuler niadtong Hulyo 16, gipresentar sa MPL country manager nga si Sarah Pante ang binulan nga report kalabot sa mga pansyaan nga gigamitan og bag-ong teknolohiya ngadto sa mga bus terminal nga gidumala sa Kapitolyo.

Suma pa sa pangangkon sa MPL nga maayo ang nadawat nga “feedback” nila kalabot sa maong mga bag-ong pansayan sa mga terminal sa Probinsya.

Sa taho sa Capitol Information Office, ang MPL maoy modevelop, modumala ug momintinar sa mga “tech-enabled” nga mga comfort rooms sa mga Tourist Rest Areas (TRA)

Ang maong mga TRAs itukod sa lungsod sa Santander, Pinamungajan, Dumanjug Balamban, Bogo, Pilar, Tudela, Poro, San Francisco ug Madridejos.

Ang maong pasilidad nga pondohan sa Kapitolyo agi’g pagsuporta kini sa programa sa Department of Tourism (DOT) nga gipangulohan ni Secretary Christina Garcia-Frasco nga anak ni gobernadora Gwen Garcia.

Sa nasayran ang DOT nagtukod na og mga TRAs lukop nasud apil sa Probinsya sa Sugbo. (BANAT NEWS)